Fótbolti.net

mán 11. maí 2026 22:19

Ívan Guðjón Baldursson

De Zerbi: Mathys Tel er miður sín

Mynd: EPA

Roberto De Zerbi þjálfari Tottenham svaraði spurningum fréttamanna eftir 1-1 jafntefli gegn Leeds United í mikilvægum slag í fallbaráttunni.

Tottenham gat komið sér fjórum stigum frá fallsvæðinu með sigri og náði forystunni með laglegu marki frá Mathys Tel í upphafi síðari hálfleiks en Tel gerðist svo sekur um slæm mistök þegar hann braut af sér innan vítateigs. Leeds jafnaði úr vítaspyrnunni og hefði getað skorað sigurmark í uppbótartíma ef ekki fyrir frábæra markvörslu frá Antonín Kinský.

Tottenham er í fallbaráttu við West Ham og eiga bæði liðin tvo leiki eftir á deildartímabilinu. Spurs spilar lokaleikina við Chelsea og Everton á meðan Hamrarnir eiga leiki við Newcastle og Leeds.

„Við spiluðum góðan leik í kvöld. Þetta var ekki frábær frammistaða útaf því að það var mikil pressa á strákunum, við vorum ekki nógu rólegir í okkar leik. Við vildum vinna leikinn strax. Ég held að við þurfum að berjast til síðustu umferðar, þetta er rosaleg fallbarátta. Leeds spilaði vel gegn okkur og vonandi sýna þeir svipaða frammistöðu þegar þeir heimsækja West Ham í lokaumferðinni," sagði De Zerbi, sem var svo spurður út í vítaspyrnuna sem Tel gaf afar klaufalega frá sér með að reyna hjólhestaspyrnu til að hreinsa boltann úr vítateignum.

„Mér þykir mjög fyrir þessari vítaspyrnu sem við fengum á okkur og Mathys Tel er miður sín. Hann er ungur og hæfileikaríkur fótboltamaður sem skoraði frábært mark og gerði svo mistök, þannig getur fótboltinn verið. Þetta er ekki vandamál fyrir mig. Ég er ánægður með hugarfarið sem hann sýndi í þessum leik. Við spiluðum ekki frábæran leik og við þurfum að laga ýmsa hluti þegar kemur að hugarfarinu. Það er erfitt að vera í fallbaráttunni, það er öðruvísi pressa heldur en þegar maður er að berjast um meistaradeildarsæti."

De Zerbi tjáði sig einnig um dómgæsluna og var spurður út í stórt atvik seint í uppbótartímanum þegar James Maddison var felldur innan vítateigs.

„Mér fannst dómarinn ekki í réttu hugarástandi í dag, kannski var hann órólegur eins og strákarnir. Það hafði sem betur fer ekki mikil áhrif á leikinn, þetta var frekar vel dæmt. Ég vil ekki tjá mig um atvikið með James Maddison því ég sá það ekki. Við eigum skilið að halda okkar sæti í þessari deild og við munum berjast fyrir því til síðustu sekúndu. Þegar maður er í fallbaráttu þá skiptir máli að vera sterkur andlega frekar heldur en líkamlega.

„Mér fannst við eiga skilið að vinna í dag en að lokum þá þjáðumst við alltof mikið og gerðum alltof mörg mistök. Við erum með 8 stig úr síðustu 4 leikjum og þurfum að halda þessu áfram.

„Við erum með svo sterkan leikmannahóp að við verðum að halda sæti okkar í deildinni."

		L	U	J	T	ms:	mf:	mun	Stig
1	Arsenal	38	26	7	5	71	27	+44	85
2	Man City	38	23	9	6	77	35	+42	78
3	Man Utd	38	20	11	7	69	50	+19	71
4	Aston Villa	38	19	8	11	56	49	+7	65
5	Liverpool	38	17	9	12	63	53	+10	60
6	Bournemouth	38	13	18	7	58	54	+4	57
7	Sunderland	38	14	12	12	42	48	-6	54
8	Brighton	38	14	11	13	52	46	+6	53
9	Brentford	38	14	11	13	55	52	+3	53
10	Chelsea	38	14	10	14	58	52	+6	52
11	Fulham	38	15	7	16	47	51	-4	52
12	Newcastle	38	14	7	17	53	55	-2	49
13	Everton	38	13	10	15	47	50	-3	49
14	Leeds	38	11	14	13	49	56	-7	47
15	Crystal Palace	38	11	12	15	41	51	-10	45
16	Nott. Forest	38	11	11	16	48	51	-3	44
17	Tottenham	38	10	11	17	48	57	-9	41
18	West Ham	38	10	9	19	46	65	-19	39
19	Burnley	38	4	10	24	38	75	-37	22
20	Wolves	38	3	11	24	27	68	-41	20