Tottenham Hotspur tók á móti Leeds United í gríðarlega mikilvægum fótboltaleik í dag. Heimamenn gátu komið sér í frábæra stöðu í fallbaráttunni með sigri en staðan var markalaus í hálfleik.

Tottenham var sterkari aðilinn í fyrri hálfleik en tókst ekki að skora framhjá Karl Darlow. Þrátt fyrir yfirburði heimamanna fengu gestirnir frá Leeds besta marktækifærið, en Antonín Kinský varði meistaralega.

Í síðari hálfleik náðu heimamenn forystunni þegar Mathys Tel skoraði draumamark eftir hornspyrnu. Boltinn barst til Tel í vítateignum sem smellhitti hann og klíndi honum undir samskeytin með mögnuðu skoti.

Leeds sýndi betri hliðar í síðari hálfleik heldur en í þeim fyrri og skapaði hættu. Gestirnir gerðu jöfnunarmark á 74. mínútu eftir hrikaleg mistök hjá Mathys Tel í eigin vítateig.

Tel tók hörmulega ákvörðun þegar hann reyndi að hreinsa boltann úr teignum með hjólhestaspyrnu. Hann var búinn að sjá Ethan Ampadu, leikmann Leeds, hlaupa í áttina að sér, en ákvað samt að reyna að hreinsa með þessum hætti. Ampadu vann skallaboltann og sparkaði Tel í hann innan vítateigs svo dómarateymið gat ekki gert annað en að dæma vítaspyrnu. Dominic Calvert-Lewin skoraði örugglega af punktinum.

Tottenham reyndi að sækja sigurmark á lokakaflanum og var 13 mínútum bætt við í uppbótartíma, en sigurmarkið lét ekki sjá sig. Leeds komst næst því að stela sigrinum þegar Antonín Kinský varði marktilraun Sean Longstaff frábærlega í slána en inn vildi boltinn ekki.

Á 103. mínútu heimtuðu heimamenn vítaspyrnu eftir að James Maddison féll til jarðar innan vítateigs en Jarred Gillett dómari dæmdi hornspyrnu í staðinn. Atvikið var skoðað í VAR-herberginu en ákveðið að ekki væri um augljós mistök dómara að ræða þó það hafi verið augljós snerting innan teigs, en leikmaður Leeds náði fyrst að snerta boltann lítillega áður en hann felldi Maddison.

Lokatölur urðu því 1-1 og er Tottenham tveimur stigum frá fallsæti þegar tvær umferðir eru eftir.

West Ham United á því enn góða möguleika á að bjarga sér frá falli.