Foreldrarnir upplifðu stundina merkilegu með Arnari Bjarka - „Þetta er ekki ódýrt nafn"

Kjartan Atli Kjartansson, þáttarstjórnandi Stúkunnar á SÝN Sport talaði um það í gær að hann hefði oft séð Arnar Bjarka æfa sig í Fífunni.

„Það er ofboðslega skemmtilegt fyrir okkur sem erum að þjálfa í Breiðablik að það Fífan er oft full af krökkum að æfa sig aukalega. Hann er einn af mörgum sem hafa nýtt sér það. Mér finnst frábært að húsið sé fyrir krakkana til að koma og æfa og gera meira alla daga," segir Gulli.

Eru alltaf mætt í stúkuna
Gunnleifur var á sínum stað í stúkunni á sunnudagskvöldið, situr alltaf í sínu sæti og móðir Arnars Bjarka, Hildur Einarsdóttir, var sömuleiðis í stúkunni í sínu fasta sæti.

„Ég sit alltaf á mínum stað í stúkunni, þetta var í beinni línu við mig. Boltinn barst svolítið óvænt til hans frá varnarmanni og þetta var bara frábært. Þetta var merkileg upplifun fyrir okkur foreldra hans, við erum alltaf á vellinum, en reyndar á sitthvorum staðnum í stúkunni."

„Ég veit ekki hvernig á að lýsa þessu. Auðvitað er þetta gleði fyrir hans hönd fyrst og fremst, það er oft þannig að ef börnin manns eru hamingjusöm þá er maður hamingjusamur. Ég veit að þetta færði honum mikla gleði. Við erum ofboðslega glöð og stolt, ekki endilega út af markinu, draumar hans eru að rætast. Það eru margir krakkar sem spila fótbolta upp alla yngri flokkana og fá ekki sénsa í meistaraflokki, ekki bara hjá okkur, heldur víða. Hans draumur hefur alla tíð verið að spila með meistaraflokki og skora á Kópavogsvelli. Það er merkilegt að upplifa það með honum."

Með allt í teskeið
Leikurinn var fyrsti byrjunarliðsleikurinn. Tókstu eftir einhverju öðruvísi hjá honum þann daginn?

„Nei, ekki þannig. Hann er að gera þetta fyrir sjálfan sig, hann er bara með þetta allt í teskeið. Hann veit alveg hvað hann vill og hvað hann þarf að gera til að ná því, hann er duglegur og vill standa sig vel fyrir liðið sitt."

Hefur hann alltaf verið framherji?

„Nei, hann hefur meira verið á kantinum og á miðjunni heldur en frammi, en hann hefur líka verið þar."

Ekki nefndur Arnar Bjarki eftir Arnari og Bjarka
Nafnið, Arnar Bjarki, er þetta eftir tvíburunum frægu?

„Nei," segir Gulli og hlær. „Nei, okkur fannst þetta bara passa. Hann er fjórða barnið og nafnið flott. Við eigum samt mynd af honum með þeim, þeir eru ágætis félagar mínir, það er til fyndin mynd af þeim þegar hann er 2-3 ára held ég. Þetta er ekki ódýrt nafn, alvöru týpur og fótboltamenn sem þeir voru."

Mikill áhugi erlendis frá
Arnar Bjarki hefur verið sterklega orðaður við Bröndby í Danmörku. Hvernig líst Gunnleifi á framtíð sonar síns?

„Það hefur verið fullt af áhuga að utan. Við bara styðjum hann í því sem hann vill gera og gerir hann hamingjusaman. Hann er með fókusinn skýran varðandi hvað hann vill. Þegar það gerist þá bara gerist það. Hann þarf bara fyrst og fremst að standa sig vel á hverjum einasta degi í því sem hann er að gera, svo kemur hitt bara í ljós og skýrist," segir Gulli að lokum.