„Það var klárlega okkar plan að halda hreinu og reyna að skora. Við skoruðum tvö í dag en fengum þetta mark á okkur. Svo þetta er súrsæt tilfinning,“ sagði Haraldur Björnsson, markvörður Stjörnunnar, eftir 2-1 sigur á mót Levadia Tallinn í Garðabæ.
Lestu um leikinn: Stjarnan 2 - 1 Levadia
Á köflum einkenndi mikil harka leikinn í dag og dómari leiksins sleppti því oft að flauta. Það fór í taugarnar á þjálfara liðsins og einhverjum leikmönnum en ekki Haraldi.
„Mér fannst hann mjög góður fyrir utan þetta hendi, víti, rautt í fyrri hálfleik. Það er fínt að láta leikinn fljóta í stað flautukonserts. Fótbolti er skemmtilegri þannig og óþolandi þegar leikurinn er stöðvaður í tíma og ótíma út af smábrotum,“ segir Haraldur.
Það var örlítill skjálfti í Stjörnunni fyrstu tíu mínúturnar en eftir það var liðið búið að stilla saman strengi sína. Markvörðurinn segir það eðlilegt enda liðið að mæta nýjum leikmönnum meðan hér heima þekki allir alla. Framundan er síðan flug til Eistlands á mánudag.
„KSÍ gerir þetta mjög vel að hleypa liðunum í Evrópukeppni í helgarfrí. Þau spila aðeins fyrr og fá því vikuna til að undirbúa sig. Það er frábært.“
Athugasemdir