Liverpool í baráttu við Man Utd um tvo miðjumenn

Brasilíumaðurinn Joao Gomes er aftur kominn á markaðinn eftir að Atletico Madrid hætti við að kaupa hann frá Wolves.

Samkvæmt Globo hefur Man Utd lengi haft Gomes í sigtinu, en Liverpool er nú komið inn í baráttuna og hefur sett sig í samband við fulltrúa leikmannsins.

Liverpool hefur einnig verulegan áhuga á franska landsliðsmanninum Manu Kone hjá Roma. Ítalska félagið er sagt reiðubúið að selja miðjumanninn í sumar, en Man Utd hefur einnig verið orðað sterklega við hann.

Wolves vill fá um 38 milljónir punda fyrir Gomes, sem er 25 ára, en Roma verðmetur Kone á um 47 milljónir punda.

Ólíklegt verður þó að teljast að Man Utd kaupi þá báða. Félagið hefur þegar fest kaup á Andrey Santos frá Chelsea og er auk þess langt komið í viðræðum við Aston Villa um Youri Tielemans.

United mun því líklega aðeins berjast við Liverpool um annan þeirra, Gomes eða Kone, en óvíst er hvort Liverpool reyni að sækja þá báða.

Það gæti ráðist af því hvort Curtis Jones eða Alexis Mac Allister, eða jafnvel báðir, yfirgefi Anfield í sumar.