„Það er gott að vera kominn aftur heim á klakann og ég er spenntur fyrir komandi tímabili," sagði Oliver Heiðarsson, nýjasti leikmaður KA, í samtali við Fótbolta.net í dag.
Oliver gekk til liðs við KA frá króatíska félaginu Lokomotiva Zagreb í dag. Hann fór til Króatíu frá ÍBV í byrjun árs en hann spilaði ekkert þar og æfði lítið. Hann fékk símtal frá Keflavík og í kjölfarið fóru fleiri lið í kapphlaupið. Hann skrifaði að lokum undir þriggja ára samning við KA.
Oliver gekk til liðs við KA frá króatíska félaginu Lokomotiva Zagreb í dag. Hann fór til Króatíu frá ÍBV í byrjun árs en hann spilaði ekkert þar og æfði lítið. Hann fékk símtal frá Keflavík og í kjölfarið fóru fleiri lið í kapphlaupið. Hann skrifaði að lokum undir þriggja ára samning við KA.
„Ég fæ þau skilaboð frá Keflavík að ég sé orðinn laus og svo fæ ég eiginlega að velja mitt lið og ég er ánægður að velja KA á endanum," sagði Oliver.
„Ég fæ símtal frá formanni Keflavíkur að það sé samþykkt tilboð. Ég vissi ekki hvort það væri lán eða kauptilboð. Ég skellti á hann og hringdi í umboðsmanninn minn, hann skildi ekkert í því. Hann hringdi í manninn okkar hjá Lokomotiva og hann segir að það sé ekki rétt, tveimur tímum síðar fæ ég símtal um að forsetinn hafi samþykkt tilboðið og ég geti farið frá klúbbnum ef ég vil."
„Ég fékk fullt af flottum símtölum en að lokum ákvað ég að koma norður."
KA hefur lengi haft augastað á Oliver.
„Umgjörðin og samtalið við Hadda var mjög gott. Mig langaði að koma í gott lið sem er að fara keppast um eitthvað. Prófa eitthvað nýtt og langaði að spila fótbolta og hafa gaman af þessu aftur. Ég vildi komast í gott umhverfi sem ég fengi að sýna það sem ég get," sagði Oliver.
„Auðvitað, það skiptir alltaf máli hversu mikinn áhuga liðið hefur áhuga á manni. KA hefur klárlega haft áhuga lengi og hafa reynt að sækja mig áður, það skiptir máli."
Oliver var spurður að því hvort það hafi komið til greina að fara aftur í ÍBV.
„Það var pæling en ég vildi prófa eitthvað nýtt, nýja áskorun," sagði Oliver.
KA fær Víking í heimsókn á föstudaginn. Oliver er klár í að taka þátt í leiknum.
„Einhverjar mínútur. Ég er auðvitað ekki búinn að æfa almennilega í smá tíma og það þarf að koma líkamanum aftur á þann stað að ég geti spilað alvöru mínútur en ég get spilað eitthvað," sagði Oliver.
Viðtalið má sjá í heild sinni í spilaranum hér að ofan.
