Englendingar ætla að læra af VAR notkuninni á EM

Notkunin á VAR myndbandsdómgæslunni á EM alls staðar hefur fengið verðskuldað hrós og vakið upp umræðu um hversu illa framkvæmdin á VAR var í ensku úrvalsdeildinni á síðasta tímabili.

Unnið er að því að VAR muni ekki hafa eins truflandi áhrif á leikina.

Fimm enskir dómarar sem störfuðu á EM með góðum árangri munu funda með kollegum sínum þegar þeir snúa aftur úr sumarfríi. Farið verður yfir það af hverju VAR notkunin lukkaðist svona miklu betur á EM en í ensku úrvalsdeildinni.

Könnun sem var gerð um mitt síðasta tímabil leiddi í ljós að stór hluti fótboltaáhugafólks var komið með upp í kok af VAR og töldu að tæknin myndi gera leikinn verri.

VAR þótti hinsvegar virka á hjálplegan hátt á EM alls staðar og enska úrvalsdeildin vill læra af notkuninni á mótinu. Á EM var það aðaldómarinn sem var miðpunkturinn í öllum ákvörðunum og VAR aðeins notað í augljósum mistökum. Tæknin hafði því lítil áhrif á flæði leiksins og var ekki truflandi.