Fjölnir búinn að finna framherja í stað Plaza (Staðfest)

Plaza yfirgaf Fjölni á dögunum eftir magnaða byrjun á tímabilinu þar sem hún skoraði tólf mörk í sjö leikjum.

„Hún féll fljótt inn í leikstíl og menningu félagsins og varð mikilvægur hluti af liðsheildinni. Á tíma sínum hjá Fjölni var hún jafnframt fyrirmynd margra ungra iðkenda með ástríðu sinni fyrir leiknum og faglegri framkomu, jafnt innan sem utan vallar. Við erum afar þakklát fyrir að hafa fengið að njóta krafta Ainhoa hjá Fjölni og þökkum henni innilega fyrir hennar framlag til félagsins. Við óskum henni velfarnaðar í næsta kafla á ferlinum og alls hins besta í komandi verkefnum,“ var skrifað í tilkynningu Fjölnis sem var ekki lengi að finna arftaka hennar.

Joana kemur inn í hóp Fjölnis í stað Plaza. Hún er einnig spænsk og hefur verið afar iðin við markaskorun með Atletico Baleares undanfarin ár, þar sem hún hefur skorað 60 mörk.

Hún getur leyst allar stöður framarlega á vellinum, býr yfir miklum hraða og les leikinn vel. Samningur hennar við Fjölni gildir út yfirstandandi tímabil.

Joana lék sinn fyrsta leik fyrir félagið þegar hún kom inn af bekknum í 2-1 tapi gegn Fylki á dögunum.

„Ég er virkilega ánægð með að vera komin til Fjölnis. Liðið lítur mjög vel út og stemningin er frábær. Ég hef mikla trú á því sem við getum áorkað saman og mun leggja mig alla fram til að styðja liðsfélaga mína og hjálpa okkur að ná markmiðum okkar á þessu tímabili,“ sagði Joana við undirskrift.