Besta deild kvenna: Stór og mikilvægur sigur Grindavíkur/Njarðvíkur á Fram

Grindavík/Njarðvík vann glæsilegan 4-0 sigur á Fram í 16. umferð Bestu deildar kvenna á JBO-vellinum í kvöld.

Leikurinn var afar mikilvægur fyrir Grindavík/Njarðvík í baráttunni um sæti í efri hlutanum fyrir tvískiptingu deildarinnar.

Ása Björg Einarsdóttir kom heimakonum yfir á 26. mínútu. Natasha Anasi tók innkast á Júlíu Ruth Thasaphong sem kom boltanum áfram á Ásu og hún kláraði færið með laglegu skoti.

Grindavík/Njarðvík var sterkari aðilinn í fyrri hálfleik þótt Framkonur ættu einnig sín augnablik.

Færin voru á báða bóga í síðari hálfleik en það voru heimakonur sem nýttu sín tækifæri. Ása skoraði sitt annað mark á 75. mínútu áður en Santa Sanija Vuskane og Emersen Jennings bættu við mörkum undir lokin.

Ása lagði upp mark Vuskane og Jennings skoraði sitt fyrsta mark fyrir félagið.

Grindavík/Njarðvík er í 5. sæti með 22 stig, fjórum stigum fyrir ofan neðri hlutann þegar tvær umferðir eru eftir fyrir tvískiptingu. Fram er í 8. sæti með 16 stig.