Þriðja liðið fylgir eftir sjónvarpsþáttunum og skrifar pistla um þau atriði sem falla að dómurum í umræðunni. Ef þú vilt fá álit á einhverju tilteknu atviku þá sendir þú okkur fyrirspurn á @3lidid á Twitter.

Af hverju mátti Fjölnir ekki taka hraða miðju? Breiðablik skoraði stórglæsilegt mark og því fögnuðu þeir innilega, það gerðu þeir á sínum vallarhelming. Þessu tóku Fjölnismenn eftir og stilltu boltanum upp spyrntu honum fram á við og voru komnir í ansi hreins álitlega sókn þegar dómari leiksins flautaði og krafðist þess að upphafsspyrnan skyldi tekin aftur. Það er alveg ljóst að það telst ekki lögleg upphafsspyrna nema að ákveðnum skilyrðum sé uppfyllt. Eitt þessara skilyrða er að dómarinn gefur merki um að hefja megi leik. Í þessu tilfelli var því ekki fyrir að fara og því taldist þessi upphafsspyrna Fjölnis ólögleg. Fyrir utan að það samræmist ekki anda leiksins um drengilegan leik að hefja leik með enga andstæðinga til varnar.

Mat Þriðja liðsins – Borðleggjandi að stoppa upphlaup Fjölnis þar sem upphafsspyrna þeirra var ekki tekin með réttum hætti. Höldum áfram að fagna mörkum og sýnum drengskap.

Var brotið á varnarmanni ÍBV þegar FH skoraði? Við hjá Þriðja liðinu erum búnir að liggja yfir myndbandsupptökum frá leik FH og ÍBV þar sem FH-ingar skoruðu í blálokin. Þá kom hár bolti fram völlinn og þar hoppa upp nokkrir varnarmenn ÍBV og sóknarmenn FH. Vildu einhverjir meina að brotið hafi verið á varnarmanni ÍBV með bakhrindingu. Við getum ekki tekið undir þessa skoðun og teljum að í þessu tilfelli hafi verið um venjulega baráttu milli leikmanna að ræða. Það er vissulega snerting en það er ekkert brot, það er mikið klaf, stöðubarátta og vissulega snertingar hér og þar en engin þeirra ólögleg. Dómari leiksins og aðstoðardómari voru vel staðsettir í þessu tilfelli, með sitthvort sjónarhornið á atvikið. Í þessum leik verður hins vegar að gefa dómurum leiksins sérstakt hrós fyrir að ná að halda sér vakandi í vægast sagt mjög svo bragðdaufum leik.

Mat Þriðja liðsins – Snerting milli leikmanna en ekki um leikbrot að ræða.

Var leikbrot í aðdraganda þriðja marks Vals? Í þriðja marki Vals er stöðubarátta milli varnarmanns Fram og sóknarmanns Vals. Sóknarmaður Vals leggur hönd á mjöðm varnarmannsins og við það fellur hann með nokkrum tilþrifum. Við teljum að ekki hafi verið um leikbrot að ræða. Það er vissulega snerting en þessi tilþrif varnarmanns Fram báru þess frekar merki að hann væri komin í vandræði og ætlaði að reyna að bjarga sér með því að fá dæmda aukaspyrnu, eins og varnarmönnum í sjálfheldu er von og vísa. Hugsum atvikið út á miðjum velli, þar hefðum við hlegið af þessu falli hjá leikmanni Fram.

Mat Þriðja liðsins – Ekki um leikbrot að ræða og vel gert að láta leikinn halda áfram.

Eiga leggings ekki líka að vera eins og stuttbuxurnar á litinn? Mikil umræða skapaðist á síðasta tímabili um búnað leikmanna og þá sér í lagi hvaða litur væri leyfilegur á undirbuxum. Þeir leikmenn sem spila í undirbuxum eru flestir í svokölluðum hjólabuxum sem oft á tíðum sjást ekki nema stuttbuxurnar lyftist upp. Skýrt er að þessar buxur skuli vera með sama lit og stuttbuxur leikmannsins. Þriðja liðinu brá nokkuð í brún þegar markmaður Fylkis mætti til leiks í forláta leggings, svörtum að lit. Buxur hans og sokkar voru hins vegar gulir. Það er alveg skýrt að þó svo að þessar leggings hafi klætt umræddan markmann mjög vel þá er honum ekki heimilt að klæðast þeim nema að þær sú samlitar stuttbuxum hans.

Í sama leik fékk varnarmaður Fylkis beint rautt spjald fyrir að sparka sóknarmann Víkings niður aftan frá. Þarna var engin spurning að um rautt var að ræða fyrir afar óheiðarlegt og hættulegt brot. Víkingurinn var með vald á boltanum og kominn framhjá leikmanni Fylkis þegar hann hendir sér á eftir honum án þess að eiga nein möguleika á að ná til boltans. Það var í raun bara heppni að ekki fór ílla í þessu tilfelli.

Mat Þriðja liðsins – Mistök hjá dómurum leiksins að leyfa markmanni Fylkis að mæta til leiks í leggings sem ekki voru samlitar stuttbuxum hans. Rauða spjaldið alveg pottþétt og vonum að Fylkismaðurinn kunni að skammast sín.

Þriðja liðið ætlar velur íþróttafréttamann hverrar umferðar og mun hann hljóta nafnbótina Fagmaður umferðarinnar.

Fagmaður fjórðu umferðar er Víðir Sigurðsson, faðir íslenskrar knattspyrnu. Víðir stjórnaði beinni lýsingu Mbl sport af mikilli fagmensku og óhætt að hrósa þeim Moggamönnum fyrir mjög góða þjónustu.

Sjá fyrri uppgjör Þriðja liðsins:
3. umferð
2. umferð
1. umferð