Championship: Leeds tapaði stigum í uppbótartíma

Leeds United hefur verið að banka á úrvalsdeildardyrnar í nokkur ár en ekki enn tekist að komast upp um deild þrátt fyrir að sýna mikla yfirburði á köflum í Championship deildinni.

Leeds leikur undir stjórn Marcelo Bielsa og hefur farið vel af stað á tímabilinu. Liðið er á toppi deildarinnar með 17 stig eftir 8 umferðir, en í dag missti liðið niður forystu gegn Derby á sorglegan hátt.

Heimamenn í Leeds komust yfir í fyrri hálfleik og stjórnuðu leiknum frá fyrstu til síðustu mínútu. Mateusz Klich klúðraði vítaspyrnu fyrir Leeds í síðari hálfleik en í þann mund sem þeir voru að landa sigrinum potaði Chris Martin inn jöfnunarmarki fyrir Derby.

Martin skoraði í uppbótartíma og var þetta eina skot gestanna sem hæfði markrammann.