Liverpool vann mjög sannfærandi sigur gegn Leicester City í síðasta leik dagsins í ensku úrvalsdeildinni.

Bæði lið eru í meiðslavandræðum, og þá sérstaklega Liverpool en það voru lærisveinar Jurgen Klopp sem spiluðu betur í kvöld og unnu sanngjarnan sigur.

Á 21. mínútu skallaði Jonny Evans boltann í eigið net. Mjög klaufalegt sjálfsmark sem kom Englandsmeisturunum í forystu.

Harvey Barnes fékk mjög gott færi til að jafna stuttu síðar en setti boltann fram hjá úr skotfæri í vítateignum. Á 41. mínútu skoraði Diogo Jota með skalla eftir fyrirgjöf frá Andy Robertson.

Staðan var 2-0 fyrir Liverpool í hálfleik; þægileg staða Englandsmeistarana. Liverpool hélt áfram þar sem frá var horfið í seinni hálfleiknum og á 86. mínútu skoraði Roberto Firmino með skalla. Firmino hefði átt að skora nokkrum mínútum áður, en þetta er hans fyrsta mark á tímabilinu. Kærkomið fyrir Brasilíumanninn.

Liverpool vann leikinn 3-0 og fer núna upp að hlið Tottenham á toppi deildarinnar með 20 stig. Leicester er í fjórða sæti með 18 stig.