Eftir slæma byrjun hjá Man Utd hefur Ole Gunnar Solskjær tekist að vinna í síðustu tveimur leikjum. Liðið vann Newcastle síðustu helgi, 4-1, og þá lagði liðið Paris Saint-Germain í Meistaradeild Evrópu á dögunum.

Timo Werner og Kai Havertz eru að hrökkva í gang hjá Chelsea en þrátt fyrir það er varnarleikurinn mikið áhyggjuefni. Varnarleikurinn hefur verið slakur hjá United en það er þó vonast eftir því Axel Tuanzebe sé lausnin í vörn heimamanna.

Liverpool fær þá Sheffield United í heimsókn á Anfield. Virgil van Dijk er sennilega frá út tímabilið og virðist brasilíski miðjumaðurinn Fabinho ætla að leysa það hlutverk en hann gerði afar vel í 1-0 sigri liðsins á Ajax í vikunni.

West Ham er þá á fleygiferð. Liðið náði í ótrúlegt 3-3 jafntefli gegn Tottenham Hotspur síðustu helgi en verkefnið gæti verið erfiðara í þetta sinn er liðið fær Manchester City í heimsókn.

Nýliðar Fulham spila þá við Roy Hodgson og félaga í Crystal Palace en leikurinn fer fram á Craven Cottage.

Leikir dagsins:
11:30 West Ham - Man City
14:00 Fulham - Crystal Palace
16:30 Man Utd - Chelsea
19:00 Liverpool - Sheffield Utd