Lengjubikar kvenna C-deild: Tindastóll í úrslit eftir stórsigur

Tindastóll er komið í úrslitaleikinn í C-deild kvenna í Lengjubikarnum eftir mjög svo þægilegan sigur á Völsungi á Sauðárkróki í dag.

Fyrirliðinn Bryndís Rut Haraldsdóttir kom Stólunum yfir eftir aðeins níu mínútur og bætti Murielle Tiernan við marki á 30. mínútu.

Murielle, sem var frábær síðasta sumar, skoraði aftur í upphafi seinni hálfleiks en þá var röðin komin að Kristu Sól Nielsen. Krista Sól, sem er fædd 2002, skoraði tvennu og leikurinn endaði með 5-0 sigri Tindastóls.

Tindastóll mun annað hvort mæta Hömrunum eða Þrótti R. í sjálfum úrslitaleiknum.