Siggi Raggi gerði NSÍ að meisturum í fyrsta sinn í 19 ár

Fyrir leikinn var ljóst að NSÍ nægði eitt stig til að tryggja sér deildarmeistaratitilinn.

Það var þó allt í járnum og útlitið orðið svart þegar HB komst yfir þegar hálftími var eftir af leiknum.

Á 84. mínútu steig Petur Knudsen hins vegar fram og jafnaði metin fyrir NSÍ. Markið reyndist gulls ígildi og tryggði liðinu deildarmeistaratitilinn.

Ótrúlegar senur, en þetta er aðeins í annað sinn í sögu NSÍ sem félagið verður meistari og í fyrsta sinn síðan 2007.

Sigurður Ragnar tók við liðinu í desember og hefur náð ótrúlegum árangri á skömmum tíma. Hann fékk Alex Frey Elísson til félagsins frá Njarðvík, en Alex lék 22 deildarleiki, skoraði eitt mark og lagði upp þrjú.

Það verður eflaust fagnað langt fram eftir í Færeyjum, en framtíð þeirra beggja er óljós. Sigurður Ragnar er að skoða alla möguleika og ekki útilokað að hann snúi aftur í íslenska boltann.

Alex, sem er samningsbundinn félaginu út tímabilið, hefur á meðan verið orðaður við félög í Bandaríkjunum, Kanada og Póllandi, auk þess sem möguleiki er á að hann snúi aftur heim.