3. deild: Toppliðið tapaði á heimavelli

Tindastóll og Höttur áttust við í eina leik kvöldsins í 3. deildinni og úr varð stórskemmtilegur slagur.

Heimamenn á Sauðárkróki gátu endurheimt fimm stiga forystu á toppi deildarinnar með sigri, en gestirnir frá Egilsstöðum voru ekki á sama máli og komust í tveggja marka forystu í fyrri hálfleik.

Bjarki Nóel Brynjarsson og Þórhallur Ási Aðalsteinsson skoruðu með stuttu millibili svo staðan var 0-2 í leikhlé. Ariel Reinero og Matheus Gotler náðu að jafna metin í gríðarlega spennandi síðari hálfleik sem endaði á dramatísku sigurmarki í uppbótartímanum, en þar var Dennis Moreno í gestaliði Hattar á ferðinni.

Tindastóll er með 31 stig eftir 15 umferðir og getur misst toppsætið ef Sandgerðingar sigra næsta leik. Höttur er um miðja deild með 19 stig.