Spánn: Barcelona mistókst að sigra gegn Alaves

Barcelona hefur ekki farið sérlega vel af stað undir stjórn Ronald Koeman en mikil ólga hefur ríkt innan félagsins undanfarna mánuði. Það hefur nokkrum sinnum komið að suðupunkti og sagði stjórn félagsins af störfum á dögunum.

Í dag heimsótti stórveldið Alaves og komust heimamenn yfir eftir hálftíma þegar Luis Rioja skoraði eftir skelfileg mistök Pedro Neto, sem ver mark Börsunga í fjarveru Marc-Andre ter Stegen.

Barca átti slakan fyrri hálfleik og tókst lítið að ógna marki Alaves. Koeman hefur látið í sér heyra í leikhlé því hann tók þrjár skiptingar og allt annað að sjá til Barca í síðari hálfleik.

Börsungar voru vaðandi í færum og missti Alaves kantmanninn Jota, fyrrum leikmaður Birmingham og Aston Villa, af velli með rautt spjald á 62. mínútu. Einni og hálfri mínútu síðar tókst Antoine Griezmann að jafna. Frakkinn gerði frábærlega, hann var á tánum og þefaði uppi lausan bolta sem rann óvart innfyrir varnarlínu Alaves áður en hann lyfti knettinum skemmtilega framhjá markverðinum.

Gestirnir héldu áfram að sækja í sig veðrið en boltinn rataði ekki í netið þrátt fyrir 19 marktilraunir eftir leikhlé.

Barca er aðeins komið með tvö stig úr síðustu fjórum deildarleikjum sínum. Liðið er átta stigum eftir toppliði Real Madrid og með leik til góða.

Alaves og Barca eru jöfn á stigum í neðri hluta deildarinnar.