Í myndbandinu má sjá landsliðið í reitarbolta æfa undir stjórn Ásmundar sem er með Þorstein Halldórsson sér til aðstoðar. Þá eru kynntar leikreglur í reitarbolta í myndbandinu auk þess sem núverandi og fyrrverandi landsliðsmenn gefa góð ráð.

,,Myndbandið var búið til sumarið 2004 minnir mig. Myndbandið var bara næsta rökrétta skref á eftir öllum töflufundunum sem ég var búinn að flytja um reglur reitaboltans hjá félögunum sem ég hafði þá verið búinn að spila hjá," sagði Ásmundur við Fótbolta.net í gær þegar að hann var spurður út í myndbandið.

,,Reitaboltasambandið var stofnað þegar ég var í FH 1997 en þeir leikmenn sem voru þar kunnu ekkert í reitabolta en ég hafði lært nokkrar góðar útfærslur hjá Lúka Kostic í KR árið áður. Það var greinilegt að það þurfti að samræma regluverkið í þessari íþróttagrein. Síðan þegar ég æfði hjá Ásgeiri heitnum Elíassyni í Þrótti þá var maður kominn í feitt enda Ásgeir landsþekktur sem guðfaðir reitabolta á Íslandi. Þar komu alls kyns nýjar útfærslur í ljós og þá var ekkert hægt annað að gera en að setja þetta saman."

,,Myndbandið var síðan sett saman í anda Knattspyrnuskóla KSÍ með Wiel Curver sem kom út í kringum 1985 en það myndband er nett steikt og þeir sem að eru vel skólaðir í því myndbandi geta vel heyrt sömu frasana úr KSÍ myndbandinu. Enda var þá líka komið tilefni til að sameina þá Heimir Guðjónsson og Arnljót Davíðsson en þeir höfðu ekki hist síðan fyrra myndbandið var tekið upp. En eins og má glögglega sjá þá höfðu þeir engu gleymt einhverjum 20 árum síðar."

,,En þetta myndband hefur síðan í seinni tíð orðið svona nokkurs konar óður um Ásgeir heitinn Elíasson í mínum huga. En ég held að þetta myndband lýsi því vel hvernig maður hann var. Þeir sem að þekkja til hans vita hvað ég er að tala um. Hann hefur að minnsta kosti haft töluverð áhrif á mig sem þjálfara. Síðan fékk ég Jón Ólafsson til að vera Rödd Reitaboltasambandsins og hann klárlega slær Hemma Gunn út. Enda smá Köttarabragur á þessu videói."

Í myndbandinu er eins og áður segir landsliðið í reitarbolta. Leikmennirnir sem þar koma fyrir eru: Ásgeir Elíasson, Einar Þór Daníelsson, Fjalar Þorgeirsson, Guðmundur Benediktsson, Heimir Guðjónsson, Lúðvík Arnarson, Páll Einarsson, Róbert Magnússon og Willum Þór Þórsson.

,,Menn voru þarna á ýmsum forsendum, t.d. voru þeir Lúðvík og Róbert í upphaflega Reitaboltasambandinu. Minnir að Lúlli hafi verið varaformaður en Róbert var sérstakur prestur sambandsins. Þess vegna voru þeir valdir. Ásgeir var að sjálfsögðu sjálfvalinn í liðið. Það vita síðan allir hversu góðir þeir Einsi Dan, Heimir og Gummi Ben eru í reit. Fjalar af því að hann er markmaður og svo Willum. Hann valdi ég bara af því að ég vildi fá að stjórna honum einu sinni og hella mér yfir hann. Átti það inni. Palli Einars var á þessum tíma besti reitaboltaspilarinn í Þrótti. Þorsteinn Halldórsson aðstoðarþjálfari náði að troða honum inn."

Myndbandið hefur ekki farið víða og því hafa ekki margir séð það áður. Í það minnsta hefur myndbandið ekki verið áður sýnt opinberlega.

,,Nei ekki opinberlega þannig lagað. En þetta hefur nú eflaust verið sýnt í einhverjum félagsheimilum íþróttafélaganna og svo í heimahúsum. En þetta myndband er ekki eign kvikmyndahúsanna. Þetta var líka vinsæl jólagjöf jólin 2004. Það eru held ég einhver 25 eintök til á DVD."

Ásmundur segir að reitarbolti sé mikið notaður á æfingum sínum hjá Gróttu.

,,Að sjálfsögðu er reitabolti mikið notaður á æfingum hjá mér. Annað væri hræsni. Það þarf líka að fara að koma í veg fyrir þessa reitaboltafordóma sem eru þarna úti. Menn gera óspart grín af þjálfurum sem eru bara með “reit og spil” á æfingum hjá sér. Það væri nú ef að fólk færi að gefa reit og spil í jólagjöf en ekki kerti og spil. Skilst að Ferguson sé með reit, skot og spil en það er líka varíasjón sem er hægt að nota."

,,Reitabolti er síðan bara einhver besta upphitunar- og tækniæfing sem hægt að nota í knattspyrnu. Þarna hjálpast tvær vinsælar íþróttagreinar hvor annarri. Svo er líka bara svo gaman í reit. Tilvalið að starta því skemmtilegasta sem að fótboltamenn gera með einhverju skemmtilegasta afbrigði af knattspyrnu sem til er. Menn þurfa bara að koma útúr skápnum og fara að spila reitabolta. Á malbiki eða bara svelli," sagði Ásmundur Haraldsson,