Dusan Brkovic, FH - Þessi reynslumikli miðjumaður sem kom frá KA lék sinn fyrsta leik fyrir FH í Bestu deildinni. Honum var fórnað í hálfleik þegar FH skipti um leikkerfi 1-0 undir gegn Breiðabliki og var tekinn af velli.

Eiður Aron Sigurbjörnsson, Vestri - Annar sem var í brasi í frumraun sinni. Lék sinn fyrsta deildarleik fyrir Vestra eftir að hafa komið frá ÍBV fyrir nokkrum vikum. Eiður Aron skoraði sjálfsmark gegn Fram en var heppinn að dómari leiksins skráði það ekki sem sjálfsmark á skýrslu sína.

Hallgrímur Jónasson, KA - KA hafði mikla yfirburði gegn HK sem allir spá neðsta sæti en náði samt ekki sigri. Hvaða leiki ætlar KA að vinna ef þeir vinna ekki HK á heimavelli sínum?

Ívar Orri Kristjánsson, dómari - FH átti að fá augljósa vítaspyrnu gegn Breiðabliki en Ívar dæmdi ekkert. Þarna hefði FH átt að fá dauðafæri á að jafna leikinn gegn Blikum.

Klukkustjórinn í Kópavoginum - Búið er að aflétta reglur um að ekki megi sýna uppbótartímann á vallarklukkunni en klukkustjórinn á Kópavogsvellinum vill ekki að áhorfendur sem mæti á völlinn fái að vita hvað tímanum líður í uppbótartíma og stoppaði á 90.

Rúnar Páll Sigmundsson, Fylkir - Þrátt fyrir að skora þrívegis gegn KR þá töpuðu Árbæingar. Dómarar leiksins höfðu litla þolinmæði fyrir þjálfara Fylkis, gáfu honum gult í boðvangnum og svo rautt eftir leik. Rúnar verður í stúkunni í 2. umferð.

Rútubílstjóri HK - Það er enn hávetur á Akureyri, vorið virðist ekki á næsta leyti og færðin eftir því. HK-ingar urðu veðurtepptir eftir jafntefli gegn KA og aumingja rútubílstjórinn þurfti að húka í tvær nætur í veðravítinu fyrir norðan.

Viktor Jónsson, ÍA - Fór illa með gott færi þegar Skagamenn töpuðu gegn Val. Hefur verið kaldur að undanförnu en þarf að hitna og sýna að hann getur skilað mörkum í efstu deild.

Ólafur Kristófer Helgason, Fylki - Markvörður Fylkis þurfti að sækja boltann fjórum sinnum úr netinu gegn KR. Fékk á sig mark beint úr horni og spurningamerki má setja við fleiri tilburði hans.

Þórarinn Ingi Valdimarsson, Stjarnan - Þessi reynslumikli bakvörður átti mjög erfitt uppdráttar gegn meisturum Víkings og var tekinn af velli í hálfleik.