Slúðurpakkinn er einungis til gamans og ef menn hafa ábendingar varðandi pakkann eða um slúður hafið þá samband á [email protected]

---

Stjarnan: Halldór Orri Björnsson gæti komið heim í Stjörnuna frá Falkenbergs í Svíþjóð. Íslandsmeistararnir eru að skoða varnarmenn þar sem Martin Rauschenberg er á förum. Brynjar Gauti Guðjónsson varnarmaður ÍBV er á óskalistanum sem og Bergsveinn Ólafsson hjá Fjölni. Hins vegar er óvíst með framtíð varnarmannsins unga Aron Heiðdal en hann er eftirsóttur eftir að hafa leikið með Keflavík á láni síðari hluta sumars.

FH: Óvíst er hvort Atli Viðar Björnsson verði áfram hjá FH en annars er búist við litlum breytingum í Hafnarfirðinum.

KR: Þjálfaramálin hjá KR eru í óvissu en Rúnar Kristinsson gæti verið á leið til Lilleström. Farid Zato er væntanlega á förum frá KR og óvíst er hvort varnarmaðurinn reyndi Grétar Sigfinnur Sigurðarson verði áfram hjá félaginu.

Víkingur: Þorsteinn Már Ragnarsson, framherji KR, er sterklega orðaður við Víking.

Valur: Atli Viðar Björnsson framherji FH er orðaður við Valsmenn. Valsmenn hafa sýnt áhuga á að fá Bergsvein Ólafsson fyrirliða Fjölnis, Hallgrím Mar Steingrímsson frá KA og varnarmanninn Aron Heiðdal frá Stjörnunni . Ásgeir Þór Ingólfsson gæti komið frá Haukum en bæði Ólafur Jóhannesson og Sigurbjörn Hreiðarsson þjálfuðu hann þar. Kolbeinn Kárason gæti verið á förum en hann hefur ákveðið að nýta uppsagnarákvæði í samningi sínum.

Fylkir: Eyþór Helgi Birgisson gæti komið í Árbæinn frá Víkingi Ólafsvík.

Breiðablik: Kristinn Jónsson er aftur á leið til Breiðabliks eftir að hafa verið í láni hjá Brommapojkarna á þessu tímabili. Blikar gætu reynt að krækja í Farid Zato og þá vill Kópavogsliðið fá Baldvin Sturluson aftur frá Stjörnunni en hann var á láni síðari hluta tímabilsins. Magnús Þórir Matthíasson leikmaður Keflvíkinga er á óskalista Blika.

Keflavík: Óskar Örn Hauksson, kantmaður KR, er sterklega orðaður við Keflavík en Frans Elvarsson er hins vegar líklega á förum frá félaginu. Keflvíkingar vilja halda Aroni Heiðdal og Hilmari Þór Hilmarssyni sem voru í láni frá Stjörnunni síðari hluta sumars. Keflvíkingar hafa einnig skoðað miðjumanninn Ben Griffiths sem spilaði með Tindastóli síðari hluta sumars.

Fjölnir: Matt Eliason, framherji Þróttar, hefur verið orðaður við Fjölni og þá gæti Atli Arnarson komið til félagsins frá Tindastóli. Fjölnismenn ætla að bjóða bandaríska framherjanum Mark Makee nýjan samning og félagið vill einnig fá Hilmar Þór Hilmarsson frá Stjörnunni en hann var í láni í Grafarvoginum í fyrra.

Fram: Arnþór Ari Atlason og Guðmundur Magnússon hafa nýtt sér uppsagnarákvæði í samningi sínum við Fram og fleiri leikmenn gætu gert slíkt hið sama. Loftur Páll Eiríksson, varnarmaður úr Tindastóli, gæti gengið í raðir Fram.

ÍBV: Dean Martin mun líklega ekki taka við þjálfun ÍBV þrátt fyrir að hafa verið í viðræðum við félagið. Ef hann tekur við þá hefur Tryggvi Guðmundsson lýst yfir áhuga á að vera aðstoðarþjálfari. Jóhannes Harðarson, fráfarandi þjálfari Flöy í Noregi, er ofarlega á blaði hjá Eyjamönnum en Ejub Purisevic þjálfari Víkings frá Ólafsvík hefur einnig verið orðaður við starfið. Af leikmannamálum ÍBV er það að frétta að Andri Rúnar Bjarnason leikmaður BÍ/Bolungarvíkur er með tilboð frá félaginu.

Leiknir R. Hilmar Þór Hilmarsson, vinstri bakvörður Stjörnunnar, er á óskalista Leiknis. Leiknismenn vilja halda Andra Fannari Stefánssyni sem var á láni frá Val síðari hluta tímabils. Breiðhyltingar vilja einnig styrkja sóknarleikinn.

ÍA: Markvörðurinn reyndi Fjalar Þorgeirsson er orðaður við Skagamenn.

Þór: Orri Freyr Hjaltalín verður líklega aðstoðarþjálfari Halldórs Jóns Sigurðssonar hjá Þór. Hlynur Atli Magnússon á förum frá Þór og óvíst er með Sigurð Marinó Kristjánsson sem gæti flutt á höfuðborgarsvæðið. Þórður Birgisson er væntanlega einnig á förum frá Þór og þá ku miðjumaðurinn ungi Jónas Björgvin Sigurbergsson vera að hugsa sér til hreyfings. Halldór Hermann Jónsson gæti komið til Þórs frá Val og Halldór Jón hefur áhuga að fá miðjumanninn Atla Arnarson frá sínu gamla félagi Tindastóli.

Grindavík: Tommy Nielsen, nýráðinn þjálfari Grindavíkur, vill fá Atla Viðar Björnsson frá FH.

HK: HK hefur áhuga á að fá Eyþór Helga Birgisson en hann er uppalinn hjá félaginu.

Haukar: Ásgeir Þór Ingólfsson gæti verið á förum frá Haukum. Haukar vilja fá framherjann Arnór Björnsson aftur frá ÍR og framherjinn Hilmar Þór Kárason gæti einnig komði til félagsins en hann er á förum frá Sindra.

KA: Hallgrímur Mar Steingrímsson er á förum frá KA en mörg lið í Pepsi-deildinni hafa áhuga á honum. Varnarmaðurinn efnilegi Gauti Gautason gæti einnig verið á förum en hann var ósáttur við að fá ekki fleiri tækifæri í sumar.

Selfoss: Ingólfur Þórarinsson gæti verið á leið í Selfoss á nýjan leik eftir að hafa verið spilandi þjálfari hjá Hamri í sumar. Miðjumaðurinn Ingþór Björgvinsson úr Hamri gæti einnig reynt fyrir sér hjá Selfyssingum.

BÍ/Bolungarvík: Líklegt er að Jón Hálfdán Pétursson taki við BÍ/Bolungarvík en hann hefur verið að þjálfa yngri flokka fyrir Vestan.

Fjarðabyggð: Fjarðabyggð hefur mikinn áhuga á að fá miðjumanninn Halldór Hermann Jónsson í sínar raðir á nýjan leik en hann er á förum frá Val.

Grótta: Þjálfaramálin á Seltjarnarnesi eru ennþá óljós. Páll Einarsson, Jóhannes Karl Guðjónsson og Sigurður Ragnar Eyjólfsson eru á óskalistanum.

Tindastóll: Einhverjar breytingar verða á Sauðárkróki. Varnarmennirnir Björn Anton Guðmundsson og Loftur Páll Eiríksson ætla að róa á önnur mið. Fannar Freyr Gíslason og Óskar Smári Haraldsson gætu einnig leitað annað.

Dalvík/Reynir: Bessi Víðisson er á leið í Dalvík/Reyni á nýjan leik eftir tvö ár hjá KA.

KF: Sjö þjálfarar hafa sótt um þjálfarastöðuna hjá KF. Slobodan Milisic, fyrrum þjálfari KA, þykur einna líklegastur til að fá starfið.