Birkir Bjarnason er leikjahæsti leikmaður íslenska landsliðsins.
Birkir Bjarnason verður heiðraður fyrir landsleik Íslands gegn Aserbaísjan á föstudag. Birkir greindi frá því í gærdag að hann hefði lagt skóna á hilluna.
Birkir er leikjahæsti leikmaður íslenska landsliðsins frá upphafi, lék alls 113 leiki og skoraði 15 mörk. Hann var lykilmaður í gullaldarliði Íslands og lék fyrir Íslands hönd á bæði EM 2016 og HM 2018.
Í tilkynningu KSÍ segir:
Birkir Bjarnason tilkynnti nýverið að hann hefði lagt knattspyrnuskóna á hilluna og verður hann heiðraður fyrir feril sinn með A landsliði karla fyrir leik Íslands og Aserbaísjan á föstudag.
Þetta verður gert eftir upphitun liðanna og vill KSÍ hvetja vallargesti til að mæta tímanlega og þakka Birki fyrir hans framlag til árangurs íslenska landsliðsins.
Athugasemdir
