Tarkowski: Hefur vantað grimmd og baráttuvilja

Hann tók við fallbaráttuliðinu á dögunum og byrjar á óvæntum sigri á heimavelli gegn toppliði Arsenal sem virtist svo gott sem óstöðvandi á vegferð sinni.

Lærisveinar Dyche spiluðu með hjartanu. Þeir börðust með kjafti og klóm og uppskáru að lokum 1-0 sigur þökk sé marki frá James Tarkowski í seinni hálfleik.

„Þetta snýst um leikmennina. Þeir vita að það minnsta sem við krefjumst frá þeim er að leggja sig alla fram, og þeir gerðu það. Við getum bætt leik okkar til muna með smá tíma en núna er mikilvægt að safna stigum og forðast fallsvæðið," sagði Dyche eftir sigurinn.

„Í dag var mikilvægt fyrir okkur að róa leikinn niður og okkur tókst það. Ég vil að strákarnir einbeiti sér meira að undirstöðuatriðunum."

James Tarkowski gerði sigurmarkið og var kátur að leikslokum. „Það hefur ekki vantað tæknileg gæði á tímabilinu, okkur hefur bara vantað smá grimmd og baráttuvilja. Það er það sem stuðningsmennirnir vilja sjá."