Nóel Atli skoraði og Adam Ingi hélt hreinu

Nóel Atli kom Álaborg yfir snemma leiks og var staðan 0-1 í leikhlé, en heimamönnum í liði Köge tókst að jafna í upphafi síðari hálfleiks.

AaB fékk frábært færi til að gera sigurmark í síðari hálfleik en boltinn rataði ekki í netið, svo lokatölur urðu 1-1. Nóel og félagar eru um miðja deild með 16 stig eftir 14 umferðir.

Adam Ingi Benediktsson hélt þá hreinu í þægilegum sigri AB gegn Vendsyssel. Lokatölur urðu 3-0 og stóð Adam Ingi sig vel á milli stanganna.

AB er í fjórða sæti með 21 stig eftir 14 umferðir, átta stigum frá toppsætinu. Fannar Berg Gunnólfsson þjálfar AB og var þetta fimmti sigurinn í síðustu sex deildarleikjum liðsins.

Í efstu deild í Danmörku tapaði Íslendingalið Lyngby á útivelli gegn Silkeborg. Ísak Snær Þorvaldsson og Davíð Helgi Aronsson voru meðal byrjunarliðsmanna Lyngby og kom William Steindórsson, sem á íslenskan afa, inn af bekknum. Þá var Daníel Freyr Kristjánsson ónotaður varamaður.

Lyngby er í fallbaráttu með 11 stig eftir 14 umferðir. Tapið gegn Silkeborg er skellur þar sem aðeins eitt stig skildi að á milli liðanna fyrir upphafsflautið.

Að lokum sigruðu liðsfélagar Andra Fannars Baldurssonar í Kasimpasa í efstu deild í Tyrklandi, en Andri Fannar var ekki í hóp frekar en í síðustu umferð. Kasimpasa er á fleygiferð og situr í fjórða sæti með 20 stig eftir 11 umferðir.

HB Köge 1 - 1 AaB
0-1 Nóel Atli Arnórsson ('10)
1-1 F. Isaki ('49)

AB 3 - 0 Vendsyssel

Silkeborg 1 - 0 Lyngby

Gaziantep 0 - 2 Kasimpasa