„Þetta var fúlt, djöfull fúlt. En að sama skapi þá komum við hrikalega sterkir inn í seinni hálfleik. Þrátt fyrir að vera manni fleiri þá er það ekkert alltaf einfalt en við settum þá undir pressu frá fyrstu mínútu í seinni hálfleik og komumst yfir svo það er hundfúlt að labba ekki héðan með þrjú stig.“
Sagði svekktur þjálfari ÍBV Hermann Hreiðarsson eftir 3-3 jafntefli hans manna gegn Keflavík fyrr í dag þar sem Keflavík leiddi 2-0 í hálfleik.
Sagði svekktur þjálfari ÍBV Hermann Hreiðarsson eftir 3-3 jafntefli hans manna gegn Keflavík fyrr í dag þar sem Keflavík leiddi 2-0 í hálfleik.
Lestu um leikinn: Keflavík 3 - 3 ÍBV
Keflvíkingar voru sterkari aðilinn framan af fyrri hálfleik allt þar til þeir misstu fyrirliða sinn af velli með rautt spjald og leiddu eins og áður sagði 2-0 í hálfleik. Hvað var að klikka hjá Eyjamönnum?
„Við bara spiluðum þetta upp í hendurnar á þeim. Vorum að tapa boltanum á vondum stöðum trekk í trekk. Í fyrsta markinu töpum við honum inn í vítateig og ef þú ert að bjóða upp á svoleiðis þá er þér refsað.“
Breki Ómarsson varð fyrir meiðslum í fyrri hálfleik og fór af velli eftir tæplega 20 mínútna leik. Arnar Breki Gunnarsson kom inn á í hans stað en var tekinn svo af velli í hálfleik. Taktísk breyting?
„Já en hann var líka eitthvað tæpur sem kannski einfaldaði það. En vissulega fórum við í taktískar breytingar þarna og það var bara eitthvað sem þurfti að gera og líka að hann var aðeins tæpur. “
Sagði Hemmi en allt viðtalið má sjá hér að ofan.
Athugasemdir