Íslenska kvennalandsliðið mætir ríkjandi heimsmeisturum Spánar á þriðjudag í undankeppni HM. Sædís Rún Heiðarsdóttir, segir íslenska liðið koma pressulaust inn í leikinn eftir dýrmætan sigur gegn Úkraínu.
„Það leggst bara mjög vel í mig. Við erum spenntar að fá þær hingað á okkar heimavöll og spennandi verkefni,“ segir Sædís Rún
Ísland kemur inn í leikinn eftir 1-0 sigur gegn Úkraínu þar sem liðið sýndi fagmennsku þrátt fyrir að leikurinn hafi ekki verið sá glæsilegasti.
„Þetta var kannski ekki fallegasti fótboltaleikur sem maður hefur spilað. Þetta var svolítið bara leikur sem við þurftum bara að klára og spila á því sem leikmaninn krafðist og mér fannst við gera það vel. Höldum hreinu og skorum mark og þá tekur maður þrjú stig.“
Thelma Karen setti sitt fyrsta landsliðsmark í þeim leik og Sædís sparaði ekki hrósið þegar hún var spurð út í hana.
„Það er frábært, það eru mikil gæði sem búa í henni Thelmu. Geggjað að sjá hana blómstra og hvernig hún hefur komið inn í landsliðinu, því hún hefur gert það virkilega vel.“
Mikið hefur verið rætt um nýju reglurnar varðandi tímamörk í innköstum og markspyrnum og er Sædís er ekki stærsti aðdáandi þeirra.
„Mér fannst þær kannski vera að taka þessu full alvarlega. Ég er ekki viss um að þetta verði alveg svona en ég get ekki sagt að ég sé stærsti aðdáandi þessa reglna. Mér finnst þetta svolítið ýkt.“
Sædís býst við allt öðru verkefni gegn heimsmeisturunum þar sem íslenska liðið muni þurfa að verjast töluvert meira en gegn Úkraínu.
„Maður gerir sér alveg grein fyrir því að þetta er aðeins öðruvísi hlutverk sem maður er að fara í miðað við leikinn sem við vorum í. Það er líka bara fínt að máta sig við þessi lið og sjá hvar við stöndum. Komum kannski pressulausar en engu að síður ætlum við að fara inn í þennan leik til að taka skref fram á við og vonandi stela þessum þrem stigum.“
Hvað þarf að gerast til að stela þessum stigum?
„Við þurfum að vera þéttar varnarlega og fara svolítið bakvið þær. Sérstaklega í byrjun, við viljum ekki að þær komist inn í leikinn með því að gefa þeim einhverja bolta ofarlega á vellinum. Svo þurfum við náttúrulega bara að spila okkar fótbolta og við höfum sýnt það að á okkar degi getum við náð stigum af öllum liðum.“
Sjáðu viðtalið í heild i spilaranum hér að ofan.
