Haukur Leifur og Valur Þór aftur í Þrótt V. (Staðfest)

Haukur er 24 ára gamall varnarmaður sem er uppalinn hjá FH en hefur leikið með HK undanfarin tvö tímabil.

Þar áður var hann í fjögur ár hjá Þrótti í Vogum og var meðal annars lykilmaður þegar liðið vann 2. deildina árið 2021. Alls hefur Haukur spilað yfir hundrað leiki fyrir Vogamenn.

Hann er nú mættur aftur í Vogana á láni frá HK út tímabilið. Haukur er kominn með leikheimild og verður klár í slaginn þegar Þróttur heimsækir Kormák/Hvöt á morgun.

Sóknarmaðurinn Valur Þór er einnig kominn til Þróttar frá Grindavík. Hann er 22 ára gamall og uppalinn hjá Keflavík en þekkir vel til í Vogunum eftir að hafa leikið þar á láni árið 2023.

Valur gekk til liðs við Grindavík fyrir tímabilið og spilaði ellefu leiki með liðinu í sumar áður en hann færði sig yfir til Þróttar. Hann lék sinn fyrsta leik undir lok júlí og fagnaði þá 3-1 sigri á Hvíta riddaranum.

Vogamenn eru í 10. sæti 2. deildar með 16 stig eftir fimmtán umferðir.