„Hollendingar lágu á okkur mest allan leikinn. Það er kannski ótrúlegt að þær hafi ekki náð inn marki. Sandra var ótrúleg í markinu," sagði Sara Björk Gunnarsdóttir, landsliðsfyrirliði, eftir leikinn.

„Þetta var einn besti leikur sem hún hefur spilað. Hún fór út í allt og var ótrúlega örugg. Hún var frábær í þessum leik."

Áslaug Munda Gunnlaugsdóttir, sem lék í varnarlínu Ísland, tók svo sannarlega undir orð fyrirliðans.

„Sandra var frábær og gerði vel í að pirra áhorfendur og leikmenn. Hún átti mjög góðar vörslur og var örugg í markinu. Þetta mark var alls ekki á henni og það er frábært að spila með henni," sagði Áslaug Munda.

Verður bara betri með aldrinum
Sandra, sem er 35 ára, var lengi vel varamarkvörður landsliðsins, en tók stöðu aðalmarkvarðar fyrir einhverjum 3-4 árum síðan og hefur ekki litið til baka eftir það.

Sandra átti það til að gera klaufaleg mistök hér og þar, en hún virðist vera búin að loka á það og maður sér það eiginlega ekki hjá henni lengur. Það er ekki annað hægt segja en að hún verði bara betri með aldrinum.

Hún var stórkostleg á Evrópumótinu og með betri markvörðum mótsins. Hún var svo stórkostleg á móti Hollandi á þriðjudag. „Við erum heppnar að hafa hana," sagði Glódís Perla Viggósdóttir, miðvörður landsliðsins, eftir leikinn við Holland.

Sandra leikur með Val, sterkasta liðinu á Íslandi, en hún hefur sýnt það með landsliðinu að hún er fær um að leika á háu Evrópustigi.

Holland var með 3,39 í xG í leiknum á móti Íslandi, en tókst bara að skora eitt mark í blálokin. Það sýnir hversu góðan leik Sandra átti en hún varði níu skot og hjálpaði liði sínu að tækla margar fyrirgjafir í leiknum.

Það héldu kannski einhverjir að Cecilía Rán Rúnarsdóttir myndi taka stöðu Söndru eftir EM, en hún verður eitthvað að bíða - allavega á meðan Sandra heldur áfram að spila líkt og hún hefur verið að gera.