Spánn: Bjargaði stigi fyrir Girona með 'Panenka' spyrnu

Girona gat komist upp fyrir Real Sociedad í 11. sæti deildarinnar með sigri á Espanyol í kvöld.

Espanyol komst yfir snemma í seinni hálfleik þegar Jofre Carreras skoraði eftir skyndisókn. Carreras brunaði upp hálfan völlinn án þess að fá nokkra mótspyrnu og tók skotið fyrir utan teig og boltinn fór í netið.

Girona fékk vítaspyrnu undir lok leiksins og reynsluboltinn Cristhian Stuani fór á punktinn.

Hann ákvað að taka svokallaða Panenka spyrnu þar sem hann vippaði beint á markið og það bar árangur, þessi 38 ára gamli sóknarmaður skoraði og tryggði Girona stig.

Girona er því í 13. sæti með 33 stig en Espanyol er í 15. sæti með 28 stig en á leik til góða.