Þessir hafa verið orðaðir við þjálfarastöðu KA

Heimir Guðjónsson
Heimir tók við Fylki síðasta vetur eftir að hafa verið með FH þar áður. Hann er einn sigursælasti þjálfari landsins og er í harðri toppbaráttu með Fylki í Lengjudeildinni.

Sem leikmaður lék Heimir eitt tímabil með KA, árið 1990. Hann er samningsbundinn Fylki út næsta ár en hann gæti hugsanlega tekið við KA eftir tímabil.

Hermann Hreiðarsson
Hemmi var rekinn frá Val fyrr í sumar og er sem stendur án starfs. Hann stýrði HK á síðasta tímabili og kom liðinu í úrslitaleik umspils Lengjudeildarinnar.

Srdjan Tufegdzic, Túfa
Túfa þekkir KA betur en flestir. Hann var hjá liðinu sem leikmaður og tók síðar við liðinu. Hann var rekinn frá sænska B-deildar liðinu Varnamö fyrr í sumar og er laus allra mála.

Sigurður Ragnar Eyjólfsson
Siggi Raggi er að gera góða hluti í Færeyjum með NSÍ Runavík. Félagið er með þriggja stiga forystu á toppi færeysku deildarinnar.

Hann hefur einnig náð eftirtektarverðum árangri með liðinu í Evrópu en liðið er komið í þriðju umferð forkeppni Sambandsdeildarinnar. Liðið er 2-0 undir í einvígi gegn svissneska liðinu Lugano en seinni leikurinn fer fram í Runavík á morgun.

Jökull Elísabetarson
Jökull var látinn taka poka sinn sem þjálfari Stjörnunnar fyrr í sumar. Hann hafði verið lengi með liðið og kom því í Evrópukeppni á síðasta tímabili.

Aron Baldvin Þórðarson
Aron er aðstoðarþjálfari Víkings og hefur verið mikið látið með hann. Hann var nálægt því að taka við ÍBV fyrir tímabil en ráðningin datt upp fyrir sig á lokametrunum.

Aron, sem er 31 árs, hefur ekki áður verið aðalþjálfari en er klárlega spennandi kostur.

Borja Martin Iglesias
Borja tók við Völsungi snemma tímabils eftir að ævintýramaðurinn Patrick De Wilde var rekinn. Komandi inn í tímabilið var búist við því að Völsungur yrði fallbyssufóður í Lengjudeildinni en það hefur alls ekki verið raunin.

Liðið er í 11. sæti Lengjudeildarinnar með 14 stig, þremur stigum frá öruggu sæti. Iglesias er 33 ára Spánverji sem hefur sýnt að það er mikið í hann spunnið.

Halldór Jón Sigurðsson, Donni
Donni sagði upp störfum sem þjálfari U19 ára landsliðs kvenna í gær eftir að hafa sinnt starfinu í tæpt ár. Þar áður stýrði hann kvennaliði Tindastóls við góðan orðstýr.

Hann er búsettur á Sauðárkróki og er hann varamaður í sveitastjórn Skagafjarðar.