Leik HK og Víkings lauk með 2-0 sigri Víkings. Leikurinn fór fram í Kórnum og var hann hluti af 16-liða úrslitum Mjólkurbikarsins.
Aron Baldvin Þórðarson, aðstoðarþjálfari Víkings, var til taks eftir leik og hafði þetta um leikinn að segja:
Lestu um leikinn: HK 0 - 2 Víkingur R.
„Við vissum að þetta yrði erfiður leikur að mæta HK hér í Kórnum. Vissum að við myndum fá bestu útgáfuna af þeim. Það er auðveld mótivering að mæta Íslandsmeisturunum ef ég sit mig í þeirra spor."
„Fannst við þó geta nýtt sénsana okkar í fyrri hálfleik, fengum horn sem við hefðum getað verið mun aggresívari í. En tókum síðan færin þegar leið á og þá var þetta aldrei spurning."
HK liðið gerði þeim mjög erfitt og sérstaklega í fyrri hálfleik enda þegar liðin gengu til hlés var staðan 0-0.
„Aron fékk helvíti góð færi sérstaklega á hans leveli, skallafærði setur hann 9 af hverju 10. En þetta var erfitt og þeir hentu sér fyrir allt og vörðust vel. Þurftum að vera agaðir og klára þetta með stæl, sem að við gerðum."
Báðir markaskorarar Víkings, þeir Valdimar og Elías komu inn af bekknum á 64.mín.
„Alveg hluti af leikplaninu, vissum að þetta yrði þolinmæðisverk. Fá inn ferskar lappir og eins og þú segir hörkuleikmenn."
Framundan hjá Víking R. er ferðalag til Vestamannaeyja og leikur við ÍBV.
„Förum með bát og æfum deginum áður. Mér líst vel á Eyjamenn, vantað kannski aðeins drápseðli á síðasta þriðjung en öflugir milli teigana. Þannig það er verðugt verkefni og sérstaklega þar sem þetta er í Eyjum."
Viðtalið má sjá í heild sinni í spilaranum hér að ofan
