Jón Þór tekur við Stjörnunni (Staðfest)

Stjarnan kvaddi Jökul seint í gærkvöldi, en hann hafði verið í þjálfarateymi meistaraflokks frá árinu 2021, fyrst sem aðstoðarþjálfari áður en hann tók við keflinu af Ágústi Gylfasyni árið 2023.

Stjörnumenn hafa ekki verið nógu duglegir við að sækja úrslit á þessari leiktíð og sitja í 9. sæti deildarinnar. Þá féll liðið úr Mjólkurbikarnum eftir tap gegn Aftureldingu.

Niðurstaðan var því sú að láta Jökul fara og var Jón Þór ráðinn í hans stað í dag. Hann kemur til félagsins frá Vestra, þar sem hann hefur verið hluti af þjálfarateyminu frá því um mitt síðasta sumar.

Jón Þór þekkir vel til hjá Stjörnunni, en hann starfaði áður hjá félaginu og þekkir því umhverfið, fólkið í kringum klúbbinn og menninguna sem lifir innan knattspyrnudeildarinnar.

Áður stýrði hann ÍA á Akranesi og íslenska kvennalandsliðinu.

Hann mun stýra sínum fyrsta leik gegn Breiðabliki á þriðjudaginn.

„Við hlökkum til að taka á móti honum á SAMSUNGVELLINUM og erum sannfærð um að völlurinn og stuðningsfólk Stjörnunnar muni taka vel á móti honum og liðinu!“ segir í tilkynningu Stjörnunnar í dag.