Blikar unnu 1-0 sigur á ÍA á Kópavogsvelli en eina mark leiksins kom úr vítaspyrnu.

Skagamenn komu boltanum í netið á 19. mínútu er Markús Páll Ellertsson fékk boltann óvænt í teignum og kláraði vel, en var réttilega dæmdur rangstæður.

Gísli Eyjólfsson átti því næst fínasta skot sem Anton Ari Einarsson varði aftur fyrir endamörk.

Á 35. mínútu dró til tíðinda er Blikar fengu hornspyrnu. Boltinn inn á teiginn og í höndina á Viktori Jónssyni. Eftir endursýningu virðist það hafa verið rangur dómur en boltinn fór fyrst í lærið á Viktori og þaðan í höndina á honum.

Jóhann Ingi Jónsson skipti ekki um skoðun og var það Höskuldur Gunnlaugsson sem fór á punktinn og skoraði. Árni Marinó Einarsson var í boltanum en ekki nóg til að halda honum úti.

Skagamenn voru nálægt því að jafna stuttu síðar. Ómar Björn Stefánsson féll við í teignum en náði skoti sem fór í stöngina og þá átti Markús Páll skalla rétt yfir.

Á lokasekúndum hálfleiksins var Jóhann Ingi spjaldaglaður eftir rifrildi á hliðarlínunni þar sem Lárus Orri Sigurðsson lét Valgeir Valgeirsson heyra það og mætti Ólafur Ingi Skúlason, þjálfari Blika, á svæðið til að svara Lárusi. Báðir þjálfarar sáu gult ásamt Rúnari Má Sigurjónssyni sem var líka að láta í sér heyra á bekknum.

Mikill hiti undir lok fyrri hálfleiks og staðan 1-0 þegar leikmenn gengu til búningsherbergja.

Snemma í síðari hálfleik var Gísli Eyjólfs hársbreidd frá því að skora gegn gömlu félögunum. Hann klobbaði Ásgeir Helga Orrason og reyndi síðan skotið en Anton Ari varði frábærlega.

Áfram héltu gestirnir í leit að marki. Á 76. mínútu átti Haukur Andri Haraldsson skot rétt fyrir utan teig sem hafnaði í þverslá. Svolítið stöngin út hjá Skagamönnum.

Undir lok leiks héldu lætin áfram á hliðarlínunni. Jóhann Ingi fékk algerlega nóg af því og rak Dean Martin, aðstoðarþjálfara ÍA, og Jón Guðna Fjóluson, aðstoðarþjálfara Blika, af velli.

Í uppbótartíma var Gísli nálægt því að jafna metin fyrir Skagamenn en Blikar komu til bjargar á ögurstundu. Honum var bara ekki ætlað að skora gegn Blikum í dag.

Lokatölur á Kópavogsvelli, 1-0, Blikum í vil sem eru með fjögur stig en ÍA með aðeins eitt stig.

Vuk Oskar afgreiddi Keflvíkinga

Vuk Oskar Dimitrijevic skoraði bæði mörk Fram í 3-1 sigri á nýliðum Keflavíkur á Lambhagavellinum í Úlfarsárdal.

Framherjinn skoraði fyrra mark sitt á 11. mínútu. Hann fékk frábæra sendingu, lék á Nacho Heras áður en hann setti boltann í hægra hornið.

Israel Garcia fékk svipað færi og Vuk aðeins nokkrum mínútum síðar en boltinn af varnarmanni og í hornspyrnu.

Keflavík ógnaði ekkert af viti í fyrri hálfleiknum og var staðan 1-0 Fram í vil í hálfleik.

Vuk Oskar var ekki lengi að bæta við öðru fyrir Fram en hann fékk sendingu frá Frey Sigurðssyni og setti boltann snyrtilega framhjá Ásgeiri Orra Magnússyni.

Keflvíkingar komu til baka á 77. mínútu er Eiður Orri Ragnarsson fékk boltann frá Halid Alghoul og kom honum í netið. Keflavík komið aftur inn í leikinn en Bjarni Páll Linnet Runólfsson drap vonir þeirra með frábæru marki í uppbótartíma.

Fram komið með fyrsta sigurinn og er nú með fjögur stig, en Keflavík áfram án stiga eftir tvo leiki.

Fram 3 - 1 Keflavík
1-0 Vuk Oskar Dimitrijevic ('11 )
2-0 Vuk Oskar Dimitrijevic ('49 )
2-1 Eiður Orri Ragnarsson ('77 )
3-1 Bjarni Páll Linnet Runólfsson ('92 )
Lestu um leikinn

Breiðablik 1 - 0 ÍA
1-0 Höskuldur Gunnlaugsson ('36 , víti)
Rautt spjald: ,Dean Edward Martin, ÍA ('90)Jón Guðni Fjóluson, Breiðablik ('90) Lestu um leikinn