Gríðarlega áhugaverður leikmaður klárar tímabilið með nýliðunum (Staðfest)

Þrátt fyrir að félagaskiptaglugginn hafi lokað síðasta miðvikudagskvöld þá voru nýliðarnir í Grindavík/Njarðvík að fá inn nýjan leikmann - öllum nauðsynlegum pappírum var skilað inn fyrir gluggalok.

Stephanie Bukovec er komin með félagaskipti og má spila gegn Fram á fimmtudag, hún er þrítug og þekkir að spila á Íslandi eftir að hafa leikið seinni hluta tímabilsins 2018 með Þór/KA. Hún lék sex deildarleiki með Þór/KA og fimm Evrópuleiki.

Stephanie er í grunninn markvörður og gæti orðið fimmti markvörðurinn sem spilar með Grindavík/Njarðvík á tímabilinu. Hún fer í samkeppni við Taylor Fox sem átti góðan leik gegn Breiðabliki í síðustu umferð. Auk Taylor hafa þær Genevieve Jae Crenshaw, Lauren Kellett og Eva Ýr Helgadóttir staðið í marki nýliðanna í Bestu deildinni á tímabilinu. Genevieve er farin til Portúgals, Lauren er hætt í fótbolta og Eva leysti af í einum leik.

Eins og áður kom fram er Stephanie í grunninn markvörður, en hún tók þá ákvörðun síðasta vetur að prófa að spila sem útileikmaður og spilaði sem framherji í hálf-atvinnumannaliði í Kanada. Hún hins vegar kemur til Íslands og semur sem markvörður, en það er aldrei að vita nema hún spreyti sig eitthvað framar á vellinum.

Hún er fædd í Kanada en lék á sínum tíma fjóra landsleiki fyrir Króatíu. Hún er ansi öflug með boltann eins og sjá má í Instagram færslunum hér að neðan.