Freyr hjá Fram til 2029 (Staðfest)

Þessi tvítugi leikmaður hefur farið á kostum með Fram á tímabilinu. Hann hefur einu sinni verið valinn leikmaður umferðarinnar og þrisvar átt sæti í liði vikunnar.

Freyr samdi við Fram árið 2023 eftir að hafa verið valinn besti leikmaður ársins á lokahófi Sindra.

Hann hafði áður leikið með 2. flokki Fram og æft með aðalliðinu veturinn áður en hann gekk formlega til liðs við félagið.

Freyr hefur leikið 13 deildarleiki á tímabilinu og skorað þrjú mörk fyrir Fram, sem hefur gert góða hluti í deildinni.

Hann hefur nú skrifað undir nýjan þriggja ára samning við félagið, en Fram staðfesti tíðindin á heimasíðu sinni.

„Það hafa verið mikil forréttindi að fylgjast með leikmanni eins og Frey í Fram treyjunni og sjá hann vaxa og dafna síðustu tímabil. Við erum ótrúlega ánægð með að hafa tryggt okkur krafta hans áfram,“ sagði Sigurður Hrannar Björnsson, formaður meistaraflokksráðs hjá Fram.