Dean Edward Martin var leikmaður KA á árunum 1995-2004 og svo aftur 2008-2010. Hann var líka þjálfari KA síðustu þrjú árin. Á Íslandi lék hann einnig með ÍA og ÍBV.
Haukur Heiðar lék sína fyrstu leiki með KA tímabilið 2008.
Dean Martin er í dag aðstoðarþjálfari ÍA.
Haukur Heiðar Hauksson ræddi um ferilinn sinn í viðtai hér á Fótbolta.net í gær. Hann spilaði með KA, KR, AIK og íslenska landsliðinu á sínum ferli. Haukur lék langoftast sem hægri bakvörður á sínum ferli og fyrstu sporin steig hann fyrir aftan Dean Martin í liði KA.
„Í 2. flokki vorum við nokkrir að detta inn í meistaraflokkinn. Ég mætti bara í menntaskólann en var alltaf með hugann við fótboltann. Félagar mínir í menntaskólanum vilja örugglega meina að þeir hafi hjálpað mér í gegnum hann, en það er náttúrulega bara kjaftæði. Þarna var hausinn alveg við fótboltann," sagði Haukur Heiðar sem æfði einnig handbolta og golf á yngri árum.
Hefðu allir gott af því að hafa einn Deano
„Þá var ég að spila fyrir aftan Deano (Dean Martin). Mér finnst hann geggjaður gæi en auðvitað koma blótsyrði upp í hugann þegar við förum að tala um Deano. Ég var ófáum sinnum kallaður ljótum nöfnum. Það voru miklar kröfur hjá honum, hann vildi aðallega vera með boltann, fá allar sendingar og innköstin þurftu að vera í lagi. Maður hristi oft hausinn þegar maður var að spila. En Deano er samt svona gæi sem reif okkur upp. Við vorum nokkrir sem vorum kannski ekkert rosalega duglegir að æfa og fara í ræktina og svona. Ég vil meina að hann hafi svolítið sparkað okkur í gang."
„Ég hristi lesturinn frá Deano alltaf af mér, náði að pæla lítið í því. Í lokin var ég samt kannski kominn með aðeins meiri leið á því að fá blótsyrðin frá honum, var farinn að svara honum annars slagið. Hann er svo flottur gæi að hann var bara ánægður með að maður svaraði."
„Það er geggjað að fá svona skóla. Mér finnst boltinn vera orðinn þannig í dag að það má segja minna. En það hefðu allir gott af því að hafa einn Deano."
Ekki margir sem hafa alltaf verið í hægri bakverði
Haukur Heiðar var spurður út í stöðuna, hægri bakvörðinn. „Ég held það séu ekkert margir ungir krakkar sem tala um að hafa alltaf verið hægri bakverðir, ég veit ekki hvernig, en einhvern veginn þróaðist þetta svona. Á mínum seinni árum í meistaraflokki KA, þá var ég svolítið á miðjunni líka."
Jamie Carragher sagði eitt sinn á Sky Sports: „No one wants to grow up to be a Gary Neville." Skaut þar á félaga sinn sem er einn þekktasti hægri bakvörður allra tíma. Haukur Heiðar var spurður hvort hann hafi langað að verða Gary Neville.
;,Það var svolítið heillandi," sagði Haukur Heiðar á léttu nótunum. „Ég átti mér svo sem enga fyrirmynd í fótboltanum, en það var allavega ekki Gary Neville."
Viðtalið í heild sinni má nálgast hér að neðan.
Athugasemdir
