Besta deildin: Tíu leikmenn ÍBV björguðu stigi

ÍBV og KA skildu jöfn, 2-2, í fjörugum leik í 15. umferð Bestu deildar karla á Hásteinsvelli í dag.

Eyjamenn byrjuðu leikinn betur. Arnór Ingi Kristinsson kom sér í ágæta skotstöðu eftir sendingu frá Alex Frey Hilmarssyni en Ívar Arnbro Þórhallsson varði. Omar Sowe átti síðan tilraun í þverslána áður en Milan Tomic skaut í varnarmann.

Gestirnir unnu sig þó betur inn í leikinn og komust yfir nánast upp úr engu á 36. mínútu. Nýi maðurinn Andre Romer átti þá gott samspil við Birgi Baldvinsson áður en hann lét vaða utan teigs og boltinn söng í stönginni og inn.

Vicente Valor var nálægt því að jafna undir lok fyrri hálfleiks. Bjarki Björn Gunnarsson átti þá frábæran sprett og kom boltanum á Vicente, sem skaut í stöngina.

Eyjamenn bönkuðu fastar á dyrnar í síðari hálfleik og Omar jafnaði þegar rúmar tuttugu mínútur voru eftir. Felix Örn Friðriksson sendi hann í gegn og þrátt fyrir að vera með tvo varnarmenn í sér náði Omar að klára færið fram hjá Ívari.

Jafnt var þó aðeins í fimm mínútur. Birgir kom KA aftur yfir með skalla eftir hornspyrnu Hallgríms Mars Steingrímssonar.

Skömmu síðar bætti gráu ofan á svart hjá Eyjamönnum þegar Omar fékk að líta rauða spjaldið á 77. mínútu. Mikill atgangur var í vítateignum fyrir hornspyrnu og var Omar vísað af velli fyrir að skalla leikmann KA.

Manni færri héldu Eyjamenn áfram að sækja og uppskáru vítaspyrnu á 84. mínútu þegar Hans Viktor Guðmundsson felldi Eið Atla Rúnarsson innan teigs. Vicente steig á punktinn, sendi Ívar í rangt horn og jafnaði metin á ný.

Valdimar Logi Sævarsson fékk gullið tækifæri til að tryggja KA öll stigin undir lok venjulegs leiktíma eftir frábæra fyrirgjöf Hallgríms Mars en skallaði yfir markið.

Adam Ægir Pálsson og Daníel Dejan Djuric áttu síðan báðir skot yfir markið á lokamínútunum og niðurstaðan varð 2-2 jafntefli.

Stigið kemur sér ágætlega fyrir Eyjamenn í ljósi þess að þeir léku lokakaflann manni færri. ÍBV fer upp í sjötta sæti með 16 stig en KA er í tíunda sæti með 14 stig.