Mjólkurbikarinn: Þór í 16-liða úrslit eftir sigur á Grindavík

Þór tryggði sér farseðilinn í 16-liða úrslit Mjólkurbikarsins í kvöld með 2-1 sigri á Grindavík.

Það tók heimamenn aðeins fjórar mínútur að taka forystuna í leiknum en það var Siglfirðingurinn, Jakob Snær Árnason, sem gerði markið. Ásgeir Marinó Baldvinsson átti góða sendingu meðfram grasinu á Jakob sem skoraði af stuttu færi.

Þeir juku forystuna á 59. mínútu með marki frá Alvaro Montejo. Sölvi Sverrisson átti skot sem Maciej Majewski varði út í teiginn. Alvaro kom á ferðinni og afgreiddi boltann í netið.

Sigurjón Rúnarsson var nálægt því að minnka muninn stuttu síðar en skalli hans fór í stöng eftir hornspyrnu. Mirza Hasecic tókst að skora fyrir Grindvíkinga á 77. mínútu.

Sigurður Bjartur Hallsson komst næst því að jafna leikinn tíu mínútum síðar en skot hans fór framhjá markinu.

Þórsarar eru fyrstir til að tryggja sæti sitt í 16-liða úrslitum með 2-1 sigri í kvöld.