ÍA tapað tólf stigum úr sigurstöðu - „Menn ekki í standi“

Skagamenn hafa hvað eftir annað misst niður forystu í Bestu deildinni í sumar og tapað samtals tólf stigum hafandi verið yfir.

Vakin var athygli á slæmu gengi Skagamanna seinni hluta leiks í Innkastinu á mánudag. „Þetta er mynstur og sýnir að menn séu ekki í standi,“ sagði Jóhann Skúli Jónsson í Innkastinu.

ÍA tapaði sínum fimmta deildarleik í röð er þeir mættu Keflavík á mánudag. Liðið situr í níunda sæti, þremur stigum frá fallsæti.

Í samtali við Fótbolta.net í gær sagði Ingimar Elí Hlynsson, framkvæmdastjóri ÍA, ekki möguleika á að félagið ráðist í þjálfarabreytingar og telur hann vanta stöðugleika í liðið.