Tindastóll er kominn með annan fótinn í 3. deild eftir 5-0 stórsigurinn á RB í kvöld.

Benjamín Jóhannes Gunnlaugarson kom Stólunum á bragðið á 6. mínútu, en undir lok hálfleiksins skoruðu heimamenn tvö sjálfsmörk á nokkrum mínútum.

Snemma í þeim síðari bætti David Bercedo við fjórða markinu áður en Arnar Ólafsson kláraði dæmið hálftíma fyrir leikslok.

Tindastóll er á toppnum með 37 stig og er með annan fótinn í 3. deild, en Stólarnir gætu haldið sófafögnuð á morgun. Ef Árborg vinnur Ými í Kórnum þá fara Stólarnir upp um deild.

Ef það gerist ekki þá fær Tindastóll tækifæri til að tryggja sætið gegn Árborg þann 31. ágúst. Sá leikur er spilaður á Sauðárkróksvelli og væri eflaust skemmtilegra fyrir norðanmenn að tryggja sér sætið þar, fyrir framan fjölskyldu og vini.