Andre Onana er mættur aftur á völlinn
Kamerúnski markvörðurinn Andre Onana stóð á milli stanganna hjá Ajax í kvöld er liðið vann Besiktas, 2-1, í Meistaradeild Evrópu. Þetta var fyrsti leikur hans með liðinu í níu mánuði.
Þessi 25 ára gamli leikmaður var dæmdur í tólf mánaða bann í febrúar eftir að hann féll á lyfjaprófi. Onana sagðist hafa óvart innbyrt lyf eiginkonu sinnar og þannig ruglast á lyfjum.
Hann kærði ákvörðun UEFA til íþróttadómstólsins í Lausanne í Sviss og ákvað dómstóllinn að stytta bannið um þrjá mánuði.
Onana hefur æft Ajax undanfarnar vikur og var síðan í markinu í kvöld er liðið vann Besiktas, 2-1.
Samningur hans við Ajax gildir út þetta tímabil en hann hefur verið orðaður við Inter á Ítalíu.
„Frábær tilfinning að vera kominn aftur. Ég var smá stressaður fyrir leikinn en liðsfélagar mínir hjálpuðu mér og ég er ánægður með þetta," sagði Onana eftir leik.
