Hver tekur við af Klopp? - Dani Olmo orðaður við Man Utd - Greenwood í skiptum fyrir Gleison Bremer
banner
   sun 25. október 2020 09:00
Ívan Guðjón Baldursson
Mourinho braut Schurrle niður: Hann er grimmur gaur
Schürrle skoraði 22 mörk í 57 A-landsleikjum.
Schürrle skoraði 22 mörk í 57 A-landsleikjum.
Mynd: Getty Images
Andre Schürrle lagði takkaskóna á hilluna í sumar, aðeins 29 ára gamall, eftir rétt rúman tíu ára feril sem atvinnumaður.

Schürrle hóf ferilinn hjá Mainz, skipti yfir til Bayer Leverkusen og var svo seldur til Chelsea þar sem hann var í tvö ár undir stjórn Jose Mourinho.

Schürrle á ekki mikið af góðum minningum eftir dvölina hjá Chelsea þó hann hafi unnið ensku úrvalsdeildina með félaginu árið 2015.

„Hann (Jose Mourinho) er grimmur gaur. Ég hugsaði alltaf með mér: 'Hvað gerir hann eiginlega hérna? Af hverju fer hann svona með mig? Af hverju gerir hann þetta við fólk?'. Þegar ég var hjá Chelsea gat ég ekki skilað af mér því sem hann vildi útaf allri hörkunni og pressunni sem hann lagði á mig," sagði Schürrle á YouTube.

„Mér leið illa hjá Chelsea. Eftir samtölin við stjórann keyrði ég oft heim og hugsaði með mér að ég gæti ekki gert þetta lengur. Hann setti ótrúlega mikla pressu á mig og ég brást ekki við eins og hann vonaði."

Schürrle spilaði í heildina 65 leiki fyrir Chelsea og gerði 14 mörk en kom oft inn af bekknum.

„Það gerðist oft að ég byrjaði leikina en mér var svo skipt út í hálfleik. Svo í næsta leik þar á eftir skildi hann mig eftir utan hóps. Þetta gerðist reglulega og ég skildi ekki hvað hann var að reyna að gera og missti sjálfstraustið. Hann særði egóið mitt og mér leið eins og hann væri að ráðast á mig persónulega.

„Svo byrjaði ég að hugsa um hvað gæti verið í gangi í hausnum hans, hvað gæti hvatt hann til að fara svona með mig. Stundum leið mér eins og hann væri bara að fylgjast með mér á æfingum en ekki öðrum leikmönnum, þó það hafi eflaust bara verið ímyndun í mér."

Athugasemdir
banner
banner
banner
banner