„Við byrjuðum illa yfir höfuð. Við vorum með vitlaust leikplan að vera pressa þær hátt. Við réðum ekki við það hvað þær voru hreyfanlegar. Við gefum annað markið, fyrsta markið var fínt hjá þeim en gefum þeim síðan annað markið sem var vont," sagði Halldór Jón Sigurðsson þjálfari Tindastóls eftir 4-1 tap gegn FH í 10. umferð Bestu deildar kvenna í kvöld.
Lestu um leikinn: FH 4 - 1 Tindastóll
Eftir að hafa verið 2-0 undir í hálfleik minnkuðu stelpurnar hans Donna hinsvegar muninn í 2-1 um miðbik seinni hálfleiks.
„Mér fannst við koma sterkari inn í leikinn í seinni hálfleik. Við breyttum leikplaninu undir lok fyrri hálfleiks og héldum því áfram í seinni hálfleik og það gekk miklu betur. Við skoruðum gott mark og hefðum getað jafnað í kjölfarið."
„Heilt yfir var ég ánægður með seinni hluta fyrri hálfleiks og fyrri hluta seinni hálfleiks."
Í upphafi leiks var mikill gæðamunur á liðunum og FH gat gert það sem þær vildu með boltann á meðan Tindastóll var í hálfgerðum eltingarleik.
„FH er með meiri gæði í sínu liði á boltann, engin spurning. Þær eru með leikmenn innan síns liðs sem hafa spilað á þessu leveli í fleiri ár og jafnvel með landsleiki og í atvinnumennsku. Eðlilega eru þær örlítið betri á boltanum, rútíneraðri og kunna hvað þær eru að gera betur."
En var Donni farinn að sjá fyrir sér jöfnunarmarkið í stöðunni 2-1?
„Orkan var klárlega farin að sveiflast okkar megin og þær voru farnar að sparka boltanum útaf því þær voru ráðalausar. Mér fannst þetta vera að sveiflast til okkar en síðan klára þær þetta með þriðja markinu því við höfðum ekki meiri orku eftir það til þess að skora tvö mörk og jafnvel þrjú. Það var í rauninni ómögulegt," sagði Halldór Jón þjálfari Tindastóls að lokum.
Athugasemdir