Tíu sem Fram gæti reynt við ef Nonni verður látinn fara

Ágúst Gylfason - Veðbankar væru með hann efstan á blaði. Hefur gert góða hluti og það var umdeilt þegar Stjarnan lét hann fara. Ágúst var fyrirliði Fram um aldamótin og var gríðarlega vinsæll leikmaður þar á sínum tíma.

Kristján Guðmundsson - Þjálfari kvennaliðs Stjörnunnar. Þessi mikli fótboltaheili gæti verið klár í að snúa aftur í karlaboltann, býr yfir mikilli reynslu og hann kæmi klárlega með nýjar hugmyndir.

Brynjar Björn Gunnarsson - Hætti sem þjálfari HK til að taka við Örgryte í Svíþjóð á síðasta ári en entist ekki lengi þar. Er ekki í starfi í boltanum sem stendur, hefur getið sér gott orð og er vafalítið til í tuskið.

Ólafur Jóhannesson - Það kitlar Óla alltaf að snúa aftur í þjálfun, það er klárt mál. Þekkir allt í bransanum og þó hann sé góður í sjónvarpinu líður honum betur á hliðarlínunni. Enn ein endurkoman?

Ejub Purisevic - Einn sá færasti á landinu. Bætir leikmenn og býr til öflugt skipulag. Býr yfir öllu sem þarf í vopnabúrinu og það eru fáir betri í að setja saman varnarleik. Ejub starfar í dag við afreksþjálfun hjá FH.

Helgi Sigurðsson - Hlutirnir eru ekki að ganga upp hjá Helga í Grindavík. Spilaði sinn fyrsta leik með Fram 1993 og sinn síðasta 2013. Fyrrum þjálfari Fylkis og ÍBV.

Sigurvin Ólafsson - Aðstoðarþjálfari FH hefur klárlega metnað til að verða aðalþjálfari í efstu deild. Spilaði með Fram um aldamótin.

Chris Brazell - Áhugaverður ungur Englendingur sem stýrir Gróttu. Spennandi þjálfari sem þarf þó aðeins að bæta samskipti við andstæðinga, dómara og fjölmiðla.

Bjarni Jóhannsson - Reynslubolti sem gæti komið inn og siglt skútunni út tímabilið, frá fallsætunum. Bjarni hefur víða komið við og var í eitt ár aðstoðarþjálf­ari Fram þegar Ásgeir Sig­ur­vins­son þjálfaði liðið.

Eiður Smári Guðjohnsen - Hætti hjá FH vegna vandræðagangs utan vallar en enginn efast um hans hæfileika og þekkingu í boltanum. Vonandi snýr Eiður aftur í bransann sem fyrst.