„Ég er mjög ánægður með að við spiluðum mjög vel í þessum leik," sagði Milan Tasic, leikmaður Víðis í Garði við Fótbolta.net.

Milan er leikmaður 18. umferðar í 2. deildinni en hann skoraði tvö mörk í 4-2 sigri á Sindra um helgina. Vindurinn setti mikinn svip sinn á leikinn.

„Það var mjög erfitt að spila út af þessum vindi en við lögðum okkur 100% fram og unnum."

Víðismenn hafa flogið upp töfluna undanfarnar vikur og unnið hvern leikinn á fætur öðrum eftir að Guðjón Árni Antoníusson tók við sem þjálfari í júní.

„Við erum byrjaðir að spila betur. Við þurftum tíma til að byrja að spila sama leikstíl og og nýi þjálfarinn vill að við spilum. Síðari hluta tímabils byrjuðum við að spila hans leikstíl."