Það var einn leikur í spænsku úrvalsdeildinni í kvöld. Eibar fékk Real Betis í heimsókn í fyrsta leik 13. umferðar spænsku deildarinnar.

Þetta var satt best að segja mjög þægilegt hjá Eibar í kvöld; þeir héldu boltanum vel og stjórnuðu ferðinni.

Það að Cristiano Piccini, varnarmaður Betis, skyldi fá rauða spjaldið hafði augljóslega einhver áhrif, en Eibar var 2-0 yfir þegar dómarinn flautaði til hálfleiks

Þeir hjá Betis náðu að minnka muninn þegar Ruben Castro skoraði á 84. mínútu, en varamaðurinn Kike náði að gulltryggja sigurinn fyrir Eibar með marki í uppbótartíma.

Lokatölur urðu 3-1 fyrir heimamenn í Eibar, en þeir eru núna með 21 stig í sjöunda sæti deildarinnar. Betis er með sjö stigum minna í 13. sætinu.