Neville skilur ekkert í Amorim: Af hverju ertu að þessu?

Neville var ósáttur með ýmsar ákvarðanir hjá Amorim en sérstaklega þá að breyta aftur um leikkerfi. Portúgalski þjálfarinn fékk mikið hrós fyrir að skipta loksins úr 3-4-2-1 leikkerfinu sínu þegar Man Utd lagði Newcastle að velli um síðustu helgi. Lærlingar Amorim spiluðu flottan leik um helgina með fjögurra manna varnarlínu og vildi Neville sjá sömu varnarlínu mæta til leiks gegn Úlfunum.

Amorim ákvað þó að snúa aftur til 3-4-2-1 leikkerfisins á heimavelli gegn Wolves. Úr varð hnífjafn leikur þar sem gestirnir frá Wolverhampton virtust líklegri til að fara með sigur af hólmi. Áhorfendur voru mjög ósáttir og urðu eftir á vellinum eftir lokaflautið til þess eins að baula á liðið sitt.

„Þetta var algjör hryllingur," sagði Neville í spjallvarpsþætti sínum. „Ekki nóg með að áhorfendur hafi baulað liðið af velli þá biðu þeir á pöllunum eftir lokaflautið til að halda áfram að baula.

„Þetta er skref aftur á bak, ég skil ekki hvers vegna hann ákvað að breyta aftur um leikkerfi. Wolves var betra liðið í þessum leik."

Amorim gerði aðeins eina breytingu á byrjunarliði Man Utd á milli sigursins gegn Newcastle og jafnteflisins gegn Wolves og því kom á óvart þegar hann breytti um leikkerfi. Joshua Zirkzee kom inn í byrjunarliðið fyrir meiddan Mason Mount og skoraði fyrsta mark leiksins.

„Um leið og hann breytti aftur í þriggja manna varnarlínu hugsaði ég: Nei Ruben, af hverju ertu að þessu? Ég vona að hann horfi til baka og átti sig á mistökunum sem hann gerði."