Fiorentina er búið að krækja sér í tékkneska landsliðsmanninn Antonin Barak á lánssamningi með kaupmöguleika sem verður að kaupskyldu ef ákveðnum skilyrðum verður mætt.
Fiorentina mun þurfa að greiða um það bil 12 milljónir evra fyrir hinn 27 ára gamla Barak sem á tvö ár eftir af samningi sínum við Verona og ekki með áhuga á að framlengja.
Barak var lykilmaður í liði Verona og skoraði 11 mörk í 30 leikjum á síðasta tímabili. Hann er sóknarþenkjandi miðjumaður og á 8 mörk í 31 landsleik með Tékklandi.
Fiorentina gæti verið búið að klára sumarið sitt í leikmannakaupum en það er ekki víst vegna þess að félagið hefur áhuga á Nedim Bajrami og Fabiano Parisi hjá Empoli og þá er Villarreal að reyna að stela Matija Nastasic frá Flórens.
Barak er partur af öflugum miðjumannahóp Fiorentina ásamt mönnum á borð við Giacomo Bonaventura, Gaetano Castrovilli og Rolando Mandragora.
Barak mun vera í beinni baráttu við Youssef Maleh og Alfred Duncan um byrjunarliðssæti.
Hann er sá fimmti sem gengur í raðir Fiorentina í sumar eftir Pierluigi Gollini, Rolando Mandragora, Luka Jovic og Dodo.
Fiorentina er með fimm stig eftir fjórar umferðir í Serie A og hefur ekki skorað síðan í 3-2 sigri gegn Cremonese í fyrstu umferð.
