Danmörk: Hjörtur og félagar héldu hreinu í sigri Bröndby

Hjörtur Hermannsson var á sínum stað í þriggja manna varnarlínu Bröndby er liðið tók á móti SönderjyskE í eina leik dagsins í dönsku ofurdeildinni.

Ísak Óli Ólafsson var utan hóps hjá SönderjyskE rétt eins og Eggert Gunnþór Jónsson sem tók út leikbann vegna uppsafnaðra spjalda.

Heimamenn voru betri í leiknum og stóðu uppi sem sigurvegarar þökk sé marki frá Jesper Lindström.

Lindström var skipt inn í hálfleik og skoraði hann stundarfjórðungi síðar. Hann fékk langan bolta upp völlinn, sneri á varnarmann og kláraði með lágu skoti í fjærhornið.

Bröndby er í fjórða sæti deildarinnar eftir sigurinn, tuttugu stigum frá toppliði Midtjylland. SönderjyskE er fjórum stigum frá fallsvæðinu.