Ísland í dag - Nokkrir spennandi úrslitaleikir

Breiðablik vann Mjólkurbikar karla í gær en úrslitaleikur Mjólkurbikars kvenna fer fram í dag. Grindavík/Njarðvík og Þróttur R. eigast við á Laugardalsvelli klukkan 16:00. Grindavík/Njarðvík leikur til úrslita í fyrsta sinn en Þróttur í annað sinn. Þróttarar komust einnig í úrslit árið 2021 en töpuðu þá 4-0 fyrir Breiðabliki.

Mikil spenna er í Lengjudeild kvenna þar sem kemur í ljós hvaða lið fer upp með Gróttu. KR er í öðru sæti með 32 stig, tveimur meira en Haukar fyrir lokaumferðina. KR tekur á móti Keflavík klukkan 14:00 en á sama tíma fá Haukar botnlið Tindastóls í heimsókn.

Lokaumferð 2. deildar karla fer einnig fram og þar er spenna bæði á toppi og botni. Selfoss og Kári berjast um að fylgja Haukum upp en Selfyssingar standa betur að vígi. Þeir eru í öðru sæti með 42 stig, þremur meira en Kári, og nægir því jafntefli til að tryggja sér sæti í Lengjudeildinni.

Kári fær deildarmeistara Hauka í Akraneshöllina á meðan Selfoss mætir KFG, sem er í harðri fallbaráttu. KFG er í tíunda sæti með 22 stig, tveimur meira en Þróttur Vogum sem er í fallsæti. Vogamenn mæta Magna og þurfa að vinna sinn leik og treysta á að KFG tapi til að bjarga sér.

Í lokaumferð 3. deildar karla kemur í ljós hvaða lið fylgir meisturum Víðis upp. KH er í öðru sæti með 41 stig, jafnmörg og Tindastóll en með töluvert betri markatölu. Reynir Sandgerði er einnig í baráttunni, í fjórða sæti með 39 stig.

KH heimsækir KF, Reynir fær KÁ í heimsókn og Tindastóll mætir Víði.

Þrjú lið eiga á hættu að falla með Árbæ. KÁ er í næstneðsta sæti með 22 stig, Ýmir er sæti ofar með 23 stig og Augnablik í níunda sæti með 24 stig. Augnablik tekur á móti Sindra, KÁ sækir Reyni heim og Ýmir heimsækir KV.

Í 2. deild kvenna ræðst hvaða tvö lið fara upp í Lengjudeildina. Öll fjögur liðin í A-riðlinum eiga enn möguleika.

Topplið Fjölnis, sem er með 36 stig, tekur á móti Vestra sem er í fjórða sæti með 33 stig. Vestri þarf að vinna með að minnsta kosti sjö marka mun til að komast upp fyrir Fjölni.

Einherji og Fylkir mætast í hinum leiknum. Einherji er í öðru sæti með 34 stig en Fylkir sæti neðar með 33 stig. Markatalan gæti því ráðið miklu um niðurstöðuna.

Í 5. deild karla leika Hamrarnir og Skallagrímur til úrslita um deildarmeistaratitilinn. Bæði lið hafa þegar tryggt sér sæti í 4. deild.