Lengjudeild kvenna: Sigurmark í uppbótartíma kom Gróttu á toppinn

Grótta er komin á topp Lengjudeildar kvenna eftir dramatískan 2-1 endurkomusigur á ÍA í Akraneshöllinni í gær.

Skagakonur, sem hafa verið að berjast í efri hlutanum, byrjuðu af krafti og komust yfir strax á 12. mínútu. Þar var Þorbjörg Jóna Garðarsdóttir á ferðinni og kom heimakonum í góða stöðu.

Grótta þurfti því að elta leikinn og svaraði í síðari hálfleik. Nicole Douglas jafnaði metin úr vítaspyrnu á 62. mínútu og allt stefndi í jafntefli þegar gestirnir stálu sigrinum í uppbótartíma.

Kristín Sara Arnardóttir reyndist hetja Gróttu þegar hún skoraði sigurmarkið á annarri mínútu uppbótartíma og tryggði liðinu gríðarlega dýrmæt þrjú stig.

Sigurinn fleytti Gróttu á toppinn með 21 stig, en ÍA er í 4. sæti með 10 stig.